العمروسي: «والدي سر عشقي للفن.. وبدأت من قصر ثقافة الأنفوشي» |حوار

محمد العمروسي يتميز بموهبة لافتة وحضور قوي، تمكن من إثبات نفسه في عدد من الأعمال الدرامية والسينمائية والمسرحية نشأ في بيئة فنية خالصة، فهو نجل الفنان الراحل سعيد العمروسي، ما جعله يتشرب حب الفن منذ صغره.  

بدأ  محمد العمروسي مشواره من قصر ثقافة الأنفوشي، حيث كانت انطلاقته الأولى من على خشبة المسرح، قبل أن يلتحق بالمعهد العالي للفنون المسرحية لتحقيق حلمه وحلم والده.

شارك محمد العمروسي في أعمال كثيرة بارزة واستطاع من خلالها أن يحجز لنفسه مكانًا مميزًا بين أبناء جيله، يتميز العمروسي باختيارات فنية جادة، وسعي دائم لتقديم أدوار تحمل قيمة ومضمون.

اقرأ أيضا|محمد العمروسي: درست المسرح تعويضا لوالدي |خاص

في البداية، حدثنا عن أول خطواتك في عالم الفن؟  
- بدأت رحلتي من قصر ثقافة الأنفوشي في الإسكندرية، وهناك اتعلمت الأساسيات، وشاركت في ورش مسرح وتمثيل، وكان ده أول احتكاك حقيقي بالفن، وخلاني أقرر إني أكمل في الطريق ده بشكل أكاديمي.

والدك هو الفنان سعيد العمروسي.. إزاي أثرت علاقتك بيه على اختياراتك الفنية؟  
- بابا كان الدافع الأول، هو اللي حببني في التمثيل من وأنا صغير، كنت بشوفه على المسرح وشايف شغفه الحقيقي، وده انعكس عليّ يمكن ده اللي خلاني أعتبر دخولي معهد الفنون المسرحية مش بس حلمي.. لكن كمان تحقيقا لحلم والدي.

 هل حسّيت إن وجود والدك فنان ممكن يكون ضغط عليك؟  
- بالعكس، كان مصدر فخر، لكن في نفس الوقت مسؤولية كبيرة، لأن الناس دايمًا بتحط المقارنة، وأنا شايف إن كل فنان لازم يبني طريقه بنفسه، لكن وجود اسم سعيد العمروسي في حياتي ساعدني أبدأ من مكان أقوى.

 هل تفضل المسرح عن التلفزيون أو السينما؟
- المسرح هو بيتي الأول، ومكان التكوين الحقيقي لأي ممثل لكن التلفزيون والسينما ليهم سحر خاص، خصوصًا لما تشتغل مع مخرجين كبار وأدوار مختلفة بحب أكون متنوع وأجرب كل الأشكال.

 شايف المشهد الفني دلوقتي إزاي؟  
- الساحة مفتوحة جدًا، وفي مواهب شابة ممتازة والكتابة القوية، هى اللى بتقدم شخصيات جديدة، مش متكررة.

 أخيرًا، إيه الرسالة اللي بتسعى توصلها من خلال فنك؟  
- عايز أقدّم فن حقيقي، يوصل للناس ويحرك فيهم مشاعر وعايز أكمّل حلم والدي بطريقتي، وأسيب بصمتي الخاصة، حتى لو كانت بسيطة، المهم تكون صادقة.