دارين حداد: مفيش كرامات في المداح.. لو في جزء سادس عايزة أرجع من غير ماكيب |خاص

تعد الفنانة دارين حداد واحدة من النجمات اللاتي أثبتن حضورهن القوي على الساحة الفنية العربية خلال السنوات الأخيرة.

انطلقت دارين حداد من تونس، ونجحت في أن تحجز لنفسها مكانة مميزة في الدراما المصرية من خلال أدوار مركبة وأداء ناضج، جعلها قادرة على التنقل ببراعة بين الشخصيات الرومانسية، والاجتماعية، وحتى الغامضة.

وفي الجزء الخامس من مسلسل "المداح"، قدمت دارين دورًا جديدًا عليها، دخلت من خلاله عالم الصراعات الروحانية والدراما النفسية، حيث جسدت شخصية تحمل في طياتها الكثير من الغموض والتأثير في خط الأحداث.

واستطاعت دارين حداد من خلال هذا الدور أن تلفت الأنظار بقوة، رغم انضمامها المتأخر للسلسلة، مؤكدة أنها قادرة على مواجهة التحديات الفنية مهما كانت صعوبتها.

 كيف جاءت مشاركتك في الجزء الخامس من "المداح"؟
جاءت بعد ترشيحي من فريق العمل، والحقيقة أنني كنت متابعة للأجزاء السابقة، وكنت متحمسة جداً لفكرة المشاركة في عمل ناجح ومختلف عن السائد.

كيف كانت أجواء التصوير في كواليس "المداح"؟
كانت أجواء رائعة، يسودها الانسجام والاحترام الكل كان مركز وبيحب الشغل، وده أهم سر في نجاح أي عمل.

سمعنا كثيراً عن وجود "كرامات" أثناء التصوير.. ما تعليقك؟
أنا ضد الكلام ده تماماً لو كانت في كرامات حقيقية بتحصل في الكواليس، المسلسل مكانش هيكمل ولا ينجح إحنا اشتغلنا بعقل وتعب واجتهاد.

حدثينا عن تفاصيل تحضيراتك لشخصية "فحيح" من حيث الشكل؟
الشخصية كانت محتاجة ميكب تقيل ومعقد جدًا كنت بقعد من 4 إلى 5 ساعات يوميًا علشان يتحط الميكب بشكل دقيق، وباخده ساعة تقريبًا علشان أشيله ده كان جزء من التحدي، بس استمتعت بيه جدًا لأنه ساعدني أدخل الشخصية بعمق.
 

ما هو أصعب مشهد واجهك في "المداح 5"؟
من غير تردد، أصعب مشهد كان الـماتشينج مع حمادة هلال المشهد كان محتاج تركيز عالٍ جدًا وتوافق في الانفعالات لازم تكون نظرتي، وحركتي، ورد فعلي في نفس اللحظة اللي بيحصل فيها التفاعل معاه، وده تحدي كبير لأي ممثل.

 كيف وجدت التعاون مع حمادة هلال؟
حمادة إنسان محترم وملتزم جدًا عنده كاريزما وحضور، وبيحب يساعد كل فريق العمل الكواليس كانت هادئة ومليانة تعاون، وده بينعكس على الشاشة.

 ما رأيك في ردود فعل الجمهور على دورك في "المداح 5"؟
الناس كانت متفاعلة جدًا، وده فرحني جدًا وصلتني رسائل وتعليقات جميلة على السوشيال ميديا، وده حسسني إن التعب ما راحش على الفاضي.

 أخيرًا، كيف تقيمين تجربتك في "المداح" بشكل عام؟
تجربة غنية، من الناحية الفنية والإنسانية  استفدت كثير، واتعلمت من الكاست، وحسيت بروح جميلة جدًا وسط الفري "المداح" مش بس مسلسل، هو حالة مختلفة، وبشكر ربنا إني كنت جزء منها.

كيف كان التعاون مع المخرج أحمد سمير فرج في "المداح 5"؟
سعيدة جدًا بالتعاون مع المخرج أحمد سمير فرج، الحقيقة هو مخرج محترف وبيفهم الممثل كويس جدًا اشتغلت معاه بارتياح شديد، وده فرق معايا في الأداء. بصراحة، أتمنى أشتغل معاه عمري كله.

 هل ترغبين في العودة لـ"المداح" إذا تم إنتاج جزء سادس؟
أكيد، أتمنى أكون موجودة في جزء سادس من "المداح"، بس بصراحة نفسي أمثل من غير ميكب .. الدور في الجزء الخامس كان مرهق جدًا بسبب الميكب الثقيل.