بوسي في حوار خاص لـ«بوابة أخبار اليوم»: نفسي أعمل فوازير وأكشن

تعيش الفنانة بوسي حالة من النشاط الفني المكثف، حيث تستعد لإطلاق ألبوم غنائي جديد في فصل الشتاء، إلى جانب طرح عدد من الأغاني المنفردة خلال الصيف الحالي.

ورغم انشغالها بالغناء، تكشف بوسي في هذا الحوار عن شغفها بالتمثيل، وحلمها بتقديم فوازير وأعمال أكشن، كما تتحدث بصراحة عن علاقتها بالشهرة، والفصل بين حياتها الخاصة والفنية.

وفي حوار خاص مع «بوابة أخبار اليوم»، فتحت بوسي قلبها للحديث عن مشاريعها القادمة، علاقتها بمدير أعمالها ومنتج ألبومها حمدي بدر، وطموحاتها الفنية خارج إطار الغناء.

 في البداية.. ما الجديد الذي تحضرين له حاليًا على مستوى الغناء؟
بوسي:
حاليًا بشتغل على ألبوم جديد إن شاء الله هينزل مع بداية الشتاء، وبيضم أشكال مختلفة ومزيكا جديدة تليق بالجمهور اللي دايمًا في ضهري. كمان عندي كذا أغنية "سنجل" هتنزل في الصيف، يعني هنفضل مع الناس على طول، بحاجات متنوعة ومبهجة.

من هو المنتج الفني لهذا الألبوم؟
بوسي:
الألبوم من إنتاج أستاذ حمدي بدر، وهو مش بس مدير أعمالي، ده أخويا وعِشرة عمري، وواقف في ضهري من أول يوم. وهو مش مجرد منتج، هو دايمًا شايف الصورة الكاملة وبيفكر في مصلحة الشغل والناس، وأنا واثقة إن اللي جاي هيكون أقوى.

 سمعنا إن عندك رغبة تخوضي مجالات فنية جديدة.. احكي لنا عن ده.
بوسي:
نفسي أوي أعمل فوازير، دي أمنية حياتي من زمان، لأن الفوازير بتخليني أستعرض كل المواهب اللي عندي؛ تمثيل، غناء، رقص.. كل حاجة.
وكمان بحب الأكشن جدًا، وبحس إني ممكن أعمل فيه حاجة مختلفة. الموضوع بالنسبة لي مش مغامرة، بالعكس، هو تطور طبيعي لأي فنان عايز يثبت نفسه في أكتر من مجال.

هل ما زال التمثيل في خطتك الفنية رغم تركيزك الأكبر على الغناء؟
بوسي:
أكيد، الغناء هو الأساس، هو اللي بدأت بيه وعايشة بيه، لكن التمثيل ليه سحر خاص. بحب تفاصيله وكواليسه والدنيا اللي حواليه. كل تجربة تمثيلية خضتها علمتني حاجات مختلفة، وطبعًا نفسي أعمل أكتر في الفترة الجاية.

 كيف تتعاملين مع الشهرة وتأثيرها على حياتك الشخصية؟
بوسي:
بحاول على قد ما أقدر أفصل بين حياتي الشخصية والفنية، وده مش دايمًا سهل. الشهرة ليها ضريبة، بتديكي حاجات وبتاخد منك حاجات تانية، خصوصًا الخصوصية والراحة.
كل حاجة محسوبة، كل خطوة بتتراقب، بس أنا راضية ومتصالحة، لأني اخترت الطريق ده بإرادتي، ونجاحي بيفرض مسؤولية.

أخيرًا.. بعد نجاحك في أغنية فيلم "الشاطر"، هل سنراك في تعاونات سينمائية أو غنائية مشابهة قريبًا؟
بوسي:
الحمد لله الأغنية لاقت رد فعل حلو جدًا، وأنا بحب أشتغل على أغاني الأفلام، لأنها بتوصل بسرعة للناس وبيبقى فيها حالة.
وفيه شغل تاني قريب إن شاء الله، سواء في السينما أو دراما أو حتى مشاريع مستقلة.. كل حاجة هتتعلن في وقتها.

اقرأ أيضا|

دنيا سامي: «أتمنى أعمل دور أكشن كوميدي»| خاص