«تعبت ودخلت المستشفى».. تامر حسني يكشف كواليس تحضير ألبوم «لينا معاد»

وجه الفنان تامر حسني رسالة إلى جمهوره بعد تصدر عدد من أغاني ألبومه الجديد «لينا معاد» تريند الأكثر استماعًا كشف من خلالها كواليس تحضير الألبوم.

وكتب تامر عبر صفحته الشخصية على فيسبوك قائلاً: «هنتهز الفرصة الجميلة دي إن أغنية الذوق العالي مع حبيبي اللي بموت فيه الـ King محمد منير تريند عام رقم واحد، وفي تريند الموسيقى لسه أول يوم أهوه والـ١٣ أغنية بتوع ألبوم لينا معاد في التريند».

وأضاف قائلًا: «عايز أقولكم حاجة عشان كنت أوصل إن ألبومي يدخل التريند كله وبعيداً عن التريند يعجبكم كده… أنا مشيت مشوار كبير أوله إني كنت بقرأ كل تعليقاتكم السلبية قبل الإيجابية لإني عارف إنكم بتحبوني، وده خلاني أركز وأحلف جوا نفسي إني لازم أفرحكم وأخليكم فخورين بالمجهود اللي عملته».

وتابع كاشفًا تعرضه لأزمة صحية قائلاً: «وتاني حاجة احترمت ذكرياتكم اللي على صوتي وتعبت تعب مش طبيعي ودخلت مستشفيات نص السنة ومش بحب أقول ولا أنزل أخبار من دي» مضيفًا: «يا جماعة أنا بحبكوا أوي ومن يوم ظهوري وأنا واحد منكم».

واستكمل رسالته لجمهوره قائلاً: «عارف إن في ألبومات مكانتش قد توقعاتكم وإن في ألبومات علامات مش هتتنسي.. بس عارف مدى حبكم لألبوم عيش بشوقك فكان جوايا تحدي واحد بس:" إني أتحدى نفسي في عيش بشوقك وأتفوق عليه فضلت أذاكر السوق الغنائي وتغير أنماط الموسيقى اللي أنا بحترمها كلها وبحترم كل الفنانين اللي نجحوا فيها».

إقرأ ايضا: هل تنتظر بسنت شوقي مولودها الأول من محمد فراج؟ الفنانة تجيب | فيديو

وتابع تامر حسني حديثه عن كواليس تحضيره لألبوم «لينا معاد» قائلًا: «فضلت أطور من أدائي وأذاكر جوا الاستوديو مع مهندسين صوت لمدة سنتين وأجتهد مع الموزعين والملحنين والشعراء اللي بشتغل معاهم في تقديم أجدد شيء، ويمكن زعلوا مني كتير من كتر ما أنا عمال أغير وأعدل وأعيد من أول وجديد».

وأضاف:« بس دلوقتي فرحتي بالدنيا وهما بيشكروني قدامكم وعلى تليفوني من الإشادات اللي سامعنها منكم في حقهم.. اشتغلت الألبوم ده وأنا جوايا عناد رهيب إن الألبوم كله يعجبكم.. أكيد هيكون في تفاوت في الإعجاب بس المهم إنكم قدرتوا مجهودي والتنوع اللي قدمته في الأوديو والڤيديو».

واختتم رسالته قائلاً: «متشكر من قلبي لكل حد نصحني وكل حد نقدني عشان بيحبني أنا سمعت كلامكم وتعبت أوي وانتوا أكيد شايفين.. تعبت عشانكم وعشان برضو أحاول أكون واجهة فنية موسيقية جميلة لمصر بحكم إني بسافر كتير أغني قصاد العالم واسمي مطرب مصري عربي..شكراً صنّاع الألبوم وكل الشكر ليكم يا أغلى الناس.. ربنا يفرحكم زي ما انتوا مفرحني دلوقتي بكلامكم الجميل».

احتفال تامر حسني بـ«الذوق العالي»

وكان الفنان تامر حسني قد احتفل بنجاح أغنية «الذوق العالي» أول دويتو يجمعه بالفنان محمد منير ونشر تامر عبر صفحته الشخصية على «انستجرام» فيديو الاحتفال، والذي ضم الكينج محمد منير وهارتي وماس رحيم بنات الملحن الراحل وعدد من المقربين وعلق قائلاً: «احتفالنا بأغنية الذوق العالي مع الـKing محمد منير وماس رحيم وهارتي رحيم أبناء الموسيقار العبقري الراحل محمد رحيم الله يرحمه ويحسن إليه».