«قولت جملة واحدة».. محمد ثروت يكشف كواليس مشاركته في «ولاد العم»

كشف الفنان محمد ثروت عن كواليس أول عمل جمعه مع المخرج شريف عرفة مشيرا إلى أن الدور كان جملة واحدة ضمن فيلم «ولاد العم» مؤكدا على أنه رغم صغر المشهد إلا أن الجمهور مازال يتذكره حتى الان.

وأوضح ثروت قائلا: «قالولي أستاذ شريف عرفة عايزك في فيلم ولاد العم.. ده حلم روحت المكان وقعدت وقولت لمساعد المخرج بعد اذنك عايز ورق الدور قالي حاضر لسه بس شوية وعدى ساعتين ويجي حد تاني أقوله عايز الورق عشان احفظ الدور عشان مقفش اتلجلج قدامه ده استاذ شريف عرفة وانا نفسي اشتغل في الفيلم ده».

وأضاف خلال لقائه في برنامج «فضفضت أوي» مع معتز التوني قائلا:« وفضلت 4 ساعات على نفس الحال وكل ما يجي حد أقوله على الورق لحد ما حد جالي وقالي البس ده قولتلهم هو ايه الدور يا جماعة يقولولي استاذ شريف عرفه هيقولك كل حاجة بنفسه».

وتابع :« ولبست اللبس اللي جابوه وفضلت قاعد 6 ساعات لحد ما جه حد قالي استاذ شريف عايزك وانا من جوايا بنهار هقول قدامه ايه والورق فين وهيقول عليا محفظتش وهدخل ليه كده ازاي» مستكملا: «المهم دخلت وسلم عليا وقعد يهزر معايا شوية لقيته بيقولي بص يا ثروت انت هتركب العربية دي وهتبص وراك وتقول «بدك تعاود ولا ايه» وسكت وانا مستنيه يكمل الدور بس طلع هو ده الدور».

واختتم حديثه قائلا:«وسبحان الله المشهد ده علم مع الناس وفاكرني ليه لحد وقتنا ده رغم أنه مكملش ثواني».

إقرأ ايضا: محمد رمضان يكشف قيمة أحدث عروضه للمشاركة في رمضان 2026

أبطال فيلم «ولاد العم»

يذكر أن فيلم «ولاد العم» والذي تم عرضه عام 2009 من بطولة كريم عبد العزيز وشريف منير ومنى زكي وانتصار من تأليف عمرو سمير عاطف وإخراج شريف عرفة.

آخر اعمال محمد ثروت

ويعد فيلم «ريستارت» والذي يعرض حاليا في دور العرض هو آخر اعمال محمد ثروت السينمائية من بطولة تامر حسني وهنا الزاهد وباسم سمرة وصلاح السقا من تأليف أيمن بهجت قمر وإخراج سارة وفيق.