لينا صوفيا: الجمهور هيشوفني بشكل مختلف تمامًا في «220 يوم»|حوار

تخوض الفنانة الشابة لينا صوفيا تجربة جديدة في مسلسل "220 يوم"، المقرر عرضه قريبًا على منصة "شاهد"، حيث تقدم فيه دورًا محوريًا يحمل الكثير من الأبعاد والتفاصيل الدرامية.

وفي هذا الحوار، تكشف لينا تصريحات خاصة "لبوابة اخبار اليوم "عن كواليس مشاركتها في العمل، وما جذبها للدور، وتفاصيل عن حياتها بعد انتهاء الدراسة، بالإضافة إلى طموحاتها الفنية المستقبلية.

إزاي تم ترشيحك لمسلسل "220 يوم"؟ وإيه أكتر حاجة شدتِك في الدور؟
ترشيحي جاء بعد مقابلة ناجحة جدًا مع المخرج كريم العدل، وكانت المقابلة دي هي اللي حسمت قراري بالمشاركة. حسّيت من أول لقاء إن عنده رؤية فنية حقيقية، وشغف بالشغل، وده شجعني جدًا. أما الدور، فهو مش تقليدي، مليان تحولات ومفاجآت، وده شدني أكتر لأنه بيسمحلي أظهر في أكتر من شكل وحالة.

المسلسل بيحكي عن قصة حب وأزمة عاطفية كبيرة.. شايفة دورك فين وسط التوترات دي؟ وهل ليكي خط درامي متشابك مع القصة الرئيسية؟
آه طبعًا، دوري متشابك جدًا مع الخط الرئيسي. الشخصيات كلها مرتبطة ببعض في حبكة قوية جدًا، ودوري بيأثر في تطورات الأحداث بشكل مباشر. المسلسل مش مجرد قصة حب، فيه تشويق ومواقف إنسانية كتير، وأنا دوري من الأدوار اللي بتحرك الصراع في وقت معين، وده بيخلّي الجمهور مترقب.

اقرأ أيضا|

لينا صوفيا تكشف تفاصيل دورها في "220 يوم" وتجربتها مع كريم فهمي| خاص

إيه أكتر صفة في شخصيتك ساعدتك تكوني ممثلة قريبة من الناس؟ وهل في حاجة حابة تغيريها في نفسك؟
أعتقد إن الصدق هو أكتر صفة ساعدتني. لما بكون قدام الكاميرا بحاول أكون حقيقية جدًا، وأوصل الإحساس زي ما هو من غير تصنع. أما الحاجة اللي نفسي أغيرها فا مفيش حاجه معينه ربنا خلقتي كدا وانا راضية ومبسوطه.

مين المخرج أو المخرجة اللي نفسك تشتغلي معاهم؟
نفسي أشتغل مع أستاذ مروان حامد، وأستاذة كاملة أبو ذكري، وأستاذ كريم الشناوي. كل واحد فيهم ليه بصمة خاصة، واتعلمت منهم كتير من خلال أعمالهم، ويشرفني جدًا أكون جزء من رؤيتهم في المستقبل.

بعد مشاركتك في "220 يوم".. إيه الخطوة اللي نفسك تاخديها فنيًا؟ بطولة مطلقة؟ سينما؟ ولا حاجة مختلفة؟
بصراحة، لسه مخلّصة امتحانات، واشتغلت كتير الفترة اللي فاتت، فبفكر آخد استراحة بسيطة أركز فيها على نفسي. ما عنديش حاليًا مشروع جديد، بس أكيد نفسي أجرّب السينما، أو بطولة في عمل مختلف يخليني أقدم حاجة جديدة. بس من غير استعجال، كل حاجة بتيجي في وقتها.

إزاي كانت تجربتك في تعلم رقص الباليه؟ وهل أثر عليكي فنيًا؟
اتدربت على رقص الباليه مع أستاذ محمود من معهد الباليه، والحمد لله بقالى سنين برقص. كان صعب في الأول جدًا، لكن دلوقتي بعتبره جزء مهم من رحلتي. الباليه علّمني الانضباط والتركيز، وساعدني كتير في التحكم في الجسد والتعبير بالمشاعر من غير كلام.

كلمينا عن تعاونك مع كريم فهمي وصبا مبارك في المسلسل؟
التعاون معاهم كان ممتع جدًا. كريم فهمي ممثل موهوب وبيحب يساعد اللي حواليه. أما صبا مبارك، فحقيقي تمثيلها استثنائي، واتعلمت منها حاجات كتير مش بس في التمثيل، لكن كمان على المستوى الإنساني. وجودهم في المسلسل خلّى التجربة أغنى وأجمل.

أخيرًا.. الجمهور هيتفرج على لينا صوفيا بإطلالة جديدة في "220 يوم".. إيه الرسالة اللي حابة توصل لهم؟
حابّة أقول للجمهور إنهم هيشوفوني في شكل مختلف تمامًا. دوري في "220 يوم" مليان تفاصيل وإنفعالات ومواقف غير تقليدية ودور محوري جدا ، وأنا متحمسة جدًا أعرف رد فعل الناس. ويا رب العمل يعجبهم، ويكون بداية لمرحلة فنية أعمق بالنسبالي.