«هدعيلك من قلبي».. حسام داغر يرثي سليمان عيد بكلمات مؤثرة

مازال الحزن يكسو على الوسط الفني منذ رحيل الفنان سليمان عيد المفاجئ إثر تعرضه لأزمة صحية لتعجز الكلمات على وصف صدمة كثير من النجوم وكان آخرهم الفنان حسام داغر الذي حرص على رثاء صديقه بكلمات مؤثرة.

وكتب حسام عبر صفحته الشخصية على فيسبوك :«اخيرا قدرت امسك الموبيل واكتبلك يا سليمان .. من بعد ما شفتك نايم في الخشبة حسيت الدنيا بجد ملهاش لازمه و كله هيمشي» مضيفا :«خلاص كده .. مفيش ضحكتك مفيش هزارك .. مفيش طيبتك .. مفيش خوفك و حبك علي الناس و مراعاة مشاعرهم حتي لو علي حسابك».

وتابع قائلا: «كنت فاكر نفسي طيب لحد ما قابلتك لقيتك مصدر الطيبه نفسها .. شفت حب الناس ليك ازاي .. الناس كانت شايفاك شبهها و قريب منها .. كل عيله فيها  خال او عم شبهك .. بس مفيهاش اب زيك .. شفتك مع ولادك و عيلتك و حتي قرايبك عامل ازاي».

واستكمل حسام داغر :«جوزت الواد والبت واطمنت عليهم.. كنت خلاص هتبدأ ترتاح من تعب السنين وشقا العمر وتاخد الجماعة وتبدأ تفكر في نفسك .. الحمد لله انك مشيت و مفيش في نفسك حاجه .. اه لو الناس تعرف كنت راضي قد ايه ومبتكسفش حد قد ايه حتي لو علي حساب نفسك».

إقرأ ايضا: بكلمات مؤثرة.. ليلى علوي تستعيد ذكرياتها مع الراحل سليمان عيد| فيديو

وأضاف :« سبت كل الدنيا ورحت للي احسن منها في الجنة .. هتشوف امك و ابوك الي وحشوك كتير و ان شاء الله تنعم بصحبة النبي سيدنا محمد في الجنة زي ما كنت بتطلبها في كل صلاة .. كنت جي الدنيا لهدف كبير و هو اضحاك الناس و تشيل عنهم همومهم .. الحمدلله انك أديت الامانه و ارتحت».

واختتم حديثه قائلا: «الموت صعب علي الي حبوك و عاشروك بسبب ألم الفراق .. بس انت انا مطمن عليك انك اكيد في احسن مكان.. رجلي مكانتش شايلاني يا حبيبي يا سليمان و انا شايلك معاهم وهدعيلك من قلبي زي ما كنت بتدعي لامي يوم ما جيتلي الخاتمة عليها من كام سنه ..  الله يرحمك يا اطيب قلب  .. الله يرحمك يا سليمان».

آخر أعمال سليمان عيد

يذكر أن الفنان سليمان عيد قد شارك مؤخرا في بطولة فيلم "فار بـ 7 أرواح"، والذي نافس ضمن أفلام موسم عيد الفطر وشاركه البطولة أحمد فتحي وإدوارد وندى موسى ودينا محسن ويزو وفرح الزاهد ولينا صوفيا ومحمد لطفي ومحمد رضوان وعلاء مرسي وعنبة من إخراج شادي علي.