اسكت ما تتكلمش

ماتتكلمش وأنت منهار لأنك هاتدلق كل أسرارك اللى مخبيها ومش عايز تقولها لحد.. ماتتكلمش وأنت غضبان لأنك هاتقول كل الكلام اللى ممكن تندم عليه بقية عمرك.. ماتتكلمش وأنت حزين لأنك هاتبقى مثار شفقة الآخرين.. ماتتكلمش وأنت فرحان لأنك هاتقدم وعودًا زائفة ربما لا تستطيع الوفاء بها او تحقيقها.. ماتتكلمش إلا وانت قادر تتحكم فى نفسك.. اسكت.. باقولك اسكت.. اسكت خالص وماتتكلمش.. ماتتحداش إنسانًا معندوش حاجة يخسرها وتأكد أن كلامك اللين يهزم كلام الناس البين، وأن ابتسامتك ساعة الخسارة تسرق فرحة المنتصر، وإذا مقدرتش يبقى لازم تجبر نفسك بالعافية وتعودها ماتتكلمش وتسكت خالص من غير ولا كلمة وتعمل ده لمصلحتك.. خليك منتظر تحقق حلمك فى الجنة.

صدقنى الجنة حقيقة جاية وبسرعة جدًا.. الجنة مواعيدك اللى اتأخرت غصب عنك والأماكن اللى مقدرتش تروحها أو تاخدها فى الدنيا

الجنة هى حبك اللى الدنيا خطفته منك، هى الفرح الذى لا تتسع له الأرض، هى الوجوه اللى اشتقتلها والوجوه اللى اتحرمت منها.. الجنة هى نهاية الحدود وبداية إشراق الوعود الربانية الجميلة وهى أكبر فرحة.. الجنة هى وداع الألم والحرمان والمعاناة.. الجنة هى كل الحريات اللى كنت بتحلم بها فلا حدود ولا قيود ولا أسوار ولا قمع ولا خوف من القادم والمجهول، الجنة هى موت المُحرمات والمَمنوعات والسُلطات.. الجنة هى موت الملل والتعب واليأس وموت الموت.. الجنة هى اللقاء بدون فراق ومافيهاش خوف من البُعد ولا الموت ولا الظروف ولا السفر. 

الجنة هى موت الغيرة والنوم والتعب والبكاء والحزن والجرح والدمع والألم.. الجنة هى اختفاء خصلات الشعر الأبيض والشيب والهالات السوداء تحت العيون والمرض.. الجنة هى اختفاء إجهاد السهر ودموع الحنين والشوق واللوعة والسهد.. الجنة وما أدراك ما الجنة.. هانكون أجمل وأصغر وأقوى.. فى الجنة هانشوف ربنا سبحانه وتعالى فى الجنة هانشوف سيدنا محمد رسول الله  يارب اوعدنا بالجنة وقربها لينا واكتبها لنا عاجلًا غير آجل يارب العالمين ببركة سيدنا النبى محمد .