نشوى مصطفى تكشف كواليس «اللمبي»: كنت مكسوفة أطلع ببدلة الرقص

تحدثت الفنانة نشوى مصطفى كواليس دورها في فيلم "اللمبي"، وسبب رفضها له في البداية.

وقالت نشوى مصطفى خلال لقائها في برنامج "ضيفي مع" مع الإعلامي معتز الدمرداش: "لما جالي الدور كان صغير جدا، قالولي إحنا مرشحينك في دور راقصة، قلت لهم لا أجرؤ على عمل هذا الدور، ومش هيليق عليا الراقصة لازم تكون حلوة، قلت لهم مش هقدر أقدم الدور".

وتابعت نشوى مصطفى: "طلبوا مني اقرأ الدور، وقريت لقيتها كاركتر، قالولي هتلبسي بدلة رقص وتحتها بيجاما، وأنا حسيتها معالجة قديمة للكوميديا، وفكرة بدلة الرقص بشكلها هتكسف أعملها".

وأكملت نشوى مصطفى حكايتها: "قلت لهم تعالوا نعملها بشكل تاني، زمان كانت البنت بتشتغل رقاصة وتقول عشان أجيب الدواء لأمي، دلوقتي ممكن الراقصة تشتغل عشان تجيب تليفون محمول أو تغير من كارت لخط، كان التليفون المحمول لسه مخترعينه جديد، واقترحت أنها تكون مثقفة مش لابسه بدلة رقص لابسه زي بوهيمي كده وأنا اللي فصلته، وقلت لهم بلاش ترقص شرقي مجتمع "اللمبي" شعبي جدا فهي ترقص تعبير حركي في الأوبرا، عدلنا في الشخصية بالاتفاق مع المؤلف والمخرج".

اقرأ ايضاً | «قلة الأعمال تدفعني للتفكير في الابتعاد».. نشوى مصطفى تتحدث عن الاعتزال

فيلم "اللمبي" تم عرضه في السينما في عام 2002، وشارك في بطولته كل من محمد سعد وحسن حسني وحلا شيحة وعبلة كامل، ومن تأليف أحمد عبد الله وإخراج وائل إحسان.