بنلف طول النهار
والانتظار تعبك
ونحط بعد المرار
نرتاح على تعبك
م الفجر يومك طويل
فيلم الغسيل شغال
والطبخ كان موال
يا منضفالي العيال
البيت صغير صحيح
لكنه من لمستك
من قلبك الواسع
بحس انه فسيح
فاق كل فيلا وقصر
جدول دروس الولاد
ع الحيطة متعلق
من بدري بيبحلق
وانت تصحي اللي ما يرضى يقوم
بالطبطبة مرة
ومرة بلوم
والكل سره معاكي
بس ف بير
يا مشبعانا حنان
يا نهر الخير
ومنين لقيتي الوقت للكروشيه ؟
ولا لكتابة القصص ؟
احترت في وصفك
يا بنت الإيييييه !!!!!
ولا يوم هجرتي مصحفك
ولا يوم
ع الشغل والأولاد رميتي اللوم
أم النظام انتي
بالرقة والمرحمة
والحب علمتي
والبسمة ما فارقتك
يا راضية بالمقسوم
فايت عليكي الزمن
ما هز يوم شالك
يللي حملتي الجميع
قوليلي مين شالك؟
عمرك ما قلتي الآه
برغم الوجع
بتموتي واقفة
خايفة بيتك يقع
سلام عليكي
وربي يحميكي
خلص الكلام
ولا وفَّى شيء فيكي
«ضيفة غامضة» قصة قصيرة للكاتبة مارا أحمد
«إقرار» قصة قصيرة للكاتب محمد عاطف الجندي
«ورد الجلنار» قصيدة للشاعر عاطف الجندي
