«انسحاب» قصيدة للشاعر أحمد رياض

حلّ إيه اللي انت عايزه يكون مثالي؟

خُد دماغي في مشكلة وفكّر بدالي

عيش مكاني لثانية واحدة وحِسّ حالي

وآدي دقني ان قلت كلمة عليها قيمةْ

عِشت اعيَّط عَ اللي ضاع واهو جَفّ نبعي

عِشت جاهل إيه اللي خدته وإيه اللي طبعي

عِشت تايه من دماغي لحد صابعي

والحياة ضرباني دايمًا بالقديمة

كل ما ارسم فيّا حاجة أقوم ماسحني

كل مرة أقول لي سِرّ أقوم فاضحني!

كل ما اجري الحزن فجأة يقوم لامحني

هي كل العيشة ضرب؟ ما فيش شتيمة؟

ضلمة ايه اللي هاقيدها بخيط و شمعة؟

و الحياة سدت ودانها معادش سامعة

عيني وقْعِت في الشوارع دمعة دمعة

و انتَ كل ما اقول وِقِعت تقول سَليمةْ!

حقي أفلت إيدي لو حسيت بعِلّةْ

حقي أرفض اكون في شمس واروح لِضلّةْ

وحدي أفضل من وجودي ف وسط شِلّةْ

هو يعني الانسحاب أصبح جريمةْ؟