"في غفلة من النسيم راحوا" .. قصيدة رثاء خالد الصاوي للـ المنتجين الثلاثة ضحايا حادث الضبعة

أهدى الفنان خالد الصاوي، المنتجين الراحلين قصيدة رثاء، بعد وفاة المنتجين: حسام شوقي ومحمود كمال وفتحي إسماعيل نتيجة تعرضهم لحادث في الساعات الأخيرة بطريق الضبعة. 

وقال الصاوي في قصيدته: "ثلاثة من شجر غيطنا، مزهزة ضيه في شبابه، ولا نشفوا ولا قدموا، ولا لحقوا ولا شابوا، شايفهم لسه من جمعة، ضحكنا لبعض في المغرب، معادي معاهم الجمعة، لكن طب الميعاد يغلب، ثلاثة من نخيل واحة، ما بين الصحرا والصحرا، في غفلة من النسيم راحوا، ماعادش لا ضلة ولا مطرة، ثلاثة من حجر نادر، وفيه العرق متأصل، نفيس الختم مشهودله، تاريخه سر متسجل، ونقرا بس مانشوفشي، ونطمن على الأوهام، نفكر بعض بالحاضر، وننسى جهلنا بقدام".

وواصل خالد الصاوي: "سلام يا حسام وحفتكرك، وإيدك عالجميع بيضا، كبير في الفانية والباقية، وسيرتك تركة وعريضة، سلام محمود.. سلام فتحي، عساكم تفهموا الحكمة، تشوفوا النعمة في رحابه، وتلقوا جوابه في الرحمة، أنا في حداد ومش عارف هيخلص فين ولا إمتى، دفنت شباب كتير.. حاسس بموت حتة ورا حتة".

ورحل عن عالمنا منذ قليل المنتجين حسام شوقي وفتحي إسماعيل ومحمود كمال، في حادث أليم على طريق الضبعة.