اطلقت مديرية التربية والتعليم بمحافظة القاهرة ، بقيادة أيمن موسي ، وكيل اول الوزارة بالقاهرة ، خدمة" اسأل ..واحنا نجيبك " عن كيفية التقديم لرياض الأطفال 2024 بمحافظة القاهرة
وتضمنت خدمة اســــــــــــــأل .. واحـــــــنا نجيـــــــــــــــبك، الرد علي كافة استفسارات اولياء الامور حول عملية التقدم للعام الدراسي الجديد 2024/2025م ، في شكل سؤال واجابة ، كالتالي:
1- ازاى اقدم لابنى في المدارس اللغات رسمي او المتميز ؟
هتدخل على الموقع الوحيد للتقديم وهو موقع البوابة الالكترونية لمحافظة القاهرة https://eduserv.cairo.gov.eg
وتعمل حساب جديد .. بعد ما تعمل الحساب هيجيلك كود تأكيد على المحمول .. هتدخله تانى على الموقع .. وبكدة يبقى حسابك اتفعل وجاهز للتقديم
2- هو لازم يكون العنوان في البطاقة على محافظة القاهرة ؟
لازم يكون عنوان ولى الأمر في البطاقة على محافظة القاهرة .. سواء الأب أو الأم اللى معاها ولاية تعليمية وهى ولى أمر الطفل.
3- لما باجى اسجل حساب جديد وادخل بياناتى بيقول فيه حاجة غلط .. اعمل ايه ؟
اتأكد انك بتدخل البيانات والبريد الالكترونى بطريقة صحيحة .. ولما تيجى تكتب اى ارقام اكتبها بكيبورد انجليزى مش عربى ... الأرقام هتظهر بالعربى على الموقع مفيش مشكلة .. واتأكد انك مدخل الأرقام القومية صح ... راجع مرة واتنين
4- الحقنى !! .. انا سجلت تمام وعملت استمارة التقديم لكن اكتشفت انى دخلت بيانات غلط ومش عارفة اعدلها لأن التعديل مفتوح على بيانات معينة بس .... هو كدة التقديم راح عليا ؟؟ ارجوك انا قلقانة جدا ومش عارفة أعمل ايه ؟
ارجوكى لازم نراجع بياناتنا كويس اوى قبل ما نضغط تأكيد الطلب ... بس مفيش اى مشكلة ولا داعى لأى قلق .. احنا هنفتح التعديلات على البيانات علشان اى حد أخطأ يصلح خطأه ... كدة كدة معانا شهر كامل للتقديم ومش هنبص على اى طلبات قبل الشهر ما ينتهى
5- طيب هو انتوا هتفتحوا التعديل ده امتى ؟
هنفتحه خلال أيام قليلة وهنعلن ده على كل قنواتنا الموجودة في نهاية البوست ... حضرتك ساعتها هتدخل من حسابك هتفتح استمارة التقديم بتاعتك وهتعدل اى بيانات اتكتبت براحتك .. بس ناخد بالنا .. بنهاية الشهر ده التعديلات هتتقفل ومش هيبقى متاح لك تغيير اى بيانات لأننا هنبدأ التنسيق والاختيار لاعلان نتيجة المرحلة الأولى
6- هو متاح التقديم انى اقدم في الرسمي لغات وارجع اقدم تانى في المتميز ؟ ومسموح ليا بكام رغبة للمدارس ؟
لا حضرتك بتختار حاجة واحدة بس .. اما رسمي لغات أو متميز ... وليك رغبة واحدة بس في المدارس
7- طيب انا لو قدمت في المتميز .. وما قبلتش ... كدة راحت فرصتى خلاص ؟
لا لو ما قبلتش هتتحول تلقائيا للرسمى لغات ولكن هيتم تسكينك على مدرسة حسب الكثافة المتاحة
8- امال فين التقديم على رياض الأطفال الحكومى او الصف الأول الابتدائى حكومي ؟
موقعنا غير متاح عليه غير التقديم للمدارس الرسمية والمتميزة لغات فقط ... الحكومى بيكون على موقع الوزارة وموقعنا ملوش علاقة بيه
9- هو فيه ايه ؟ كل ماجى ادخل على الحساب بتاعى يقولى الرقم القومى او كلمة السر غلط ... أعمل ايه ؟
لازم تتأكد انك لما عملت حساب جديد اول مرة جالك كود تفعيل على الموبايل ودخلته تانى علشان حسابك يتفعل .. ولازم تدخل الرقم القومى للطفل صح .. الرقم القومى بتاع الطفل مش بتاع حضرتك ... واوعى تنسى كلمة السر بتاعتك .. وتدخلها صح
10- عملت كل اللى بتقول عليه ده ومش عارف ادخل على حسابى برضه ... اعمل ايه ؟
دوس على "نسيت كلمة السر" وأدخل الرقم القومى والتليفون المسجل على الموقع .. هيجيلك كود على الموبايل ... دخله على الموقع واعمل كلمة سر جديدة بدل القديمة
11- لو عندى مشكلة ممكن اتواصل معاكم ازاى ؟
دى كل وسائل التواصل بتاعتنا ... هتلاقينا دايما معاك
الموقع الالكترونى : www.cairo.gov.eg
البريد الالكترونى : [email protected]
الفيس بوك : الصفحة الرسمية للبوابة الالكترونية لمحافظة القاهرة
قناة الماسنجر : https://m.me/j/AbafIrHF2JrvELXC
قناة الواتس
https://whatsapp.com/channel/0029VaakvHTFSAsvUIapR21b
قناة اليوتيوب https://www.youtube.com/channel/UCueIM8LF8X1MzR52uaf3Niw?view_as=subscriber
تليفون / 23909123
اقرا ايضا | انطلاق المراجعات النهائية لطلاب الشهادتين الإعدادية والثانوية بالقاهرة
