رد الفنان تامر عاشور على الملحن عمرو مصطفى بعد اتهام الآخير بسرقة لحن إحدى أغانيه، خلال حسابه عبر موقع التواصل الاجتماعي فيس بوك ووجه له رسالة شدية اللهجة.
وقال عاشور:" أغنية «الرك على النيه» من ألحان عمرو مصطفى وفي أي حفلة ومكان بقول كدة، والملحن اللي باعهالي وهو «المُقتَبِس الحقيقي» مش أنا، وعمرو مصطفى مجبش سيرته نهائي مش عارف ازاي، مع إنه عارفه من ٨ سنين، ولما قفلنا الموضوع ده «أنا وهو» في مكالمتنا مباشرةً، وبعدين أنا مالي ده صِراع مُبدعين ويقدر ياخد حقه قانوني ويوقفها محدش منعه، أنا أداة على حد وصفه، ده غير إن الاستعانة بعمرو مش صعبة واشتغلنا مع بعض في أغنية «انطق».
وأضاف: "كل الحكاية إنه معرفش يجاوب على السؤال «الصناعة انهارت ازاي وأنت عمود من عمدان الصناعة؟»، السؤال اللي مش هتلاقي له إجابة مهما توّهت الناس اللي كلهم قالولك أنك مجاوبتش بمنتهى الوعي".
وتابع: "وأنا الحقيقة كنت مُنتظر إجابتك علشان أقولك الصناعة فيها كام عمود غيرك، وكام مُطرب عمل تاريخ وعلامات من غيرك، ومنهم أنا وكام مُلحن وشاعر وموزع اشترك في نجاح مطربين وإعلانات وتترات وكل حاجة حصلت عادي بدونك".
واستكمل: "أنا احترمتك أو على حد قولك إن تامر وهو بيكلمني «كان واقف كدهو»، طبعًا احترمك وأقدّرك أنت أستاذ كبير، بس قلّيت في نَظر تلميذك لما اتكلمت في التلفزيون عن إن فيه حد عمومًا احترمك وكأنه حدث جلل لأستاذ كبير زيك، في النهاية انت مُلحن كبير مقامًا وفنّا وإضافه لأي مُطرب غيري، «هي الظروف حكمت كده ولا تاريخي فيه عمرو والعكس صحيح»، ومش هفوت الفُرصه دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار ٢٠ سنة، وحطوني في مكانة أنا مكنتش احلم بيها وسط الجمهور العربي كله، اللي بنحاول نقدمله إبداع حقيقي مهما ذادت بنّا المناواشات الواردة التي لا تتخطى حاجز الأدب والصداقة والمحبة والود ولمصلحة نجاحنا واستمراريته بفضل الله ثُم فضلكم، واشكر اعظم فرقة موسيقية بشتغل معاها جوة وبرة مصر اللي بيخلوني قادر على «التصدير الدائم والمختلف» للفن المصري الرائع بحضوري كفرد من تلاميذ لأساتذه كبار حقيقيين".
واختتم: "اشكر "مَصر" حبيبتي فعلا بدون إدّعاء ولا مُذايده ولا حتى أغاني - جمهورها اللي على كل الاذواق اللي بيسمعوا كل حاجه وكل لون وكل خَبط ورزع وفي الآخر ياخدوا الحلو ويعيش معاهم ويصدروه-، ويرموا الوحش وباب النجاح لأي فنان عربي «واشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالمية حرفيًا، ومش من مرة واحدة بدأت هناك خطوات ومجهود وتعب ومُسانده وهكذا.. إلى أن تمت النجاحات الكبيره الحمد لله ومنها إلى كل الدول العربية اللي اعشق جماهيرهم وحبهم للفن المصري عمومًا، الموضوع كبير قوي يا استاذ عمرو تيجي حضرتك يا أستاذ في الآخر تقول عليا إني مثل حي لإستباحة جُمل لحنية لناس عايشة بالباطل، وعايز بعيونك الحلوه دي تشوف خير في الصناعة؟".
أقرأ أيضا عمرو مصطفي يتهم تامر عاشور بسرقة لحن أغنيته
وفي وقت سابق رد الفنان عمرو مصطفى على التصريح الذي أدلى به المطرب والملحن تامر عاشور مؤخرا، ورفض فيه وصف عمرو مصطفى حال صناعة الموسيقى المصرية حاليا بالانهيار، وذلك خلال إستضافته في برنامج "حبر سري" الذي تقدمة الإعلامية أسما إبراهيم، عبر شاشة القاهرة والناس.
وقال عمرو مصطفى: "يا تامر في أغنية أنا عملتها لمصطفى صندل التركي، إنت أخذت اللحن والتوزيع الموسيقي، ونزلت الأغنية وكتبت عليها اسم ملحن تاني، والمفروض إنك داخل صناعة الموسيقى".
وتابع: "الصناعة أصبحت إن منتجي الأغاني بيسرقوا أغاني وألحان، وأنا لسه مسروق مني أغنيتين من مطربي المهرجانات، هل هذا لا يعني إن الصناعة تعرضت للتدمير، وهل يرضيك وجود المهرجانات وصورتنا خارج مصر، واختفاء أصوات مثل أم كلثوم وعبد الحليم"
واستكمل حديثه قائلا: "إنت مثل من أمثلة استباحة الجمل اللحنية لأشخاص على قيد الحياة، والمفروض كنت تشيل الأغنية من يوتيوب لما عرفت إنها لحني وتستأذن مني، لكن ملقتش أي احترام واستباحها".
