«عيد الأضحى» أوبريت للشاعر الدكتور إيهاب عبد السلام

الجميع:

يا اللي قرَيِّب يا اللي بعيدْ

يللا تعالوا الإيد في الإيدْ

شوفوا الدنيا الكوره الدايره

عملت حاجه جميله أكِيدْ

لَفِّتْ لَفَّه وعَمَلِتْ زَفَّه

وجَابِتْ لِينَا بسُرْعَه العِيدْ

حلنتش:

عيدِ الأضْحَى بِيْعَلِّمْنَا

مَعْنَى الطَّاعَه وِالتَّضْحِيَّه

وِيْجَمَّعْنَا مَعَ أهْلِينَا

في لمَّه جَمِيلَه وأكله هَنِيَّه

جُوَّه مَدِينَه أوْ في القَرْيَه

حَوَالِين سُفْرَه أوْ طَبْلِيَّه

شعراوي:

لأ يا حَلَنْتَشْ اسْمع بُصْ

العيد مَا هُوشْ أكْلِ وَبَسْ

عيدِ الأضْحَى كُلُّه سَعَادَه

العيد أبَدًا مِشْ تَبْذِير

العيد بَهْجَه ونور وعْبَادَه

وِنْـرَدِّد فيـهِ التَّكْبِير

صحصح:

وِتْجَمَّعْنا صلاةِ العيدْ

تتجمَّع فيهَا الأفْوَاجْ

سُنَّة أكِيدَه ولَمَّه سَعِيدَه

بِنْشَارِكْ فِيهَا الحُجَّاجْ

ونْوَزَّعْ فيهِ الأُضْحِيَّه

وِنْفَرَّحْ قَلْبِ المِحْتَاجْ

ذكاوة:

صَحْ يَا صَحْصَحْ إنت فَصِيحْ

وكلامَك مظبوط وصَحِيحْ

وَكَمَان لَمَّا يجينَا العِيد

يِمْلا الدُّنْيَا بالتَّفَارِيحْ

بَيْفَرْحَنْا بِلِبْسِ جدِيدْ

وِبتِكْتِر فِيهِ المَرَاجِيحْ

زقزوقة:

يللا يا عمو لذيذ دوَّقْنَا

دا احنا لأكْلَكْ يا ما اشتقنا

العيد عندك أكْلِ وفتَّه

لُهْ في وجُودَكْ طَعْمِ ومعْنَى

تسلم إيدك.. الله يزيدك

نِسْمَعْ اسْمَكْ بِيْجَوْعَنَا

عمو لذيذ:

هَاتُوا اصحَابكم مَعَ قَرَايِبْكُم

يللا اتْلَمُّوا سَوَا يَا وْلادْ

أصْلِ الفَرْحَه مَتِبْقَاشْ فَرْحَه

مِنْ غِيرْ لَمَّه فِي الأعْيَادْ

جِدُّو وسِتُّو وخَالُّوا وعَمُّو

ووْلادْهُم أسْعَدْ وسُعَادْ

الجميع:

يا اللي قرَيِّب يا اللي بعيد

يللا تعالوا الإيد في الإيد

شوفوا الدنيا الكوره الدايره

عملت حاجه جميله أكِيدْ

لَفِّتْ لَفَّه وعَمَلِتْ زَفَّه

وجَابِتْ لِينَا بسُرْعَة العِيدْ