ياجنتي
اللمسة منك معجزه بتمسني
ويفتح الورد ف إيديك
والدنيا يملاها العبير
بتجدد الشوق و الشغف
يبدأ معاك ولا ينتهيش
يفتح بيبان متقفله
يكشف كنوزي المهمله
واصغر معاك عشرين سنه
واركب بساط الريح واطير
سايب لجام الضحكه وقت الصهلله
والعشق عاشق عشقنا
وبتبتسملي أنتبه
واقرا ف عيونك دهشتك
لا تندهش
دا الحب أجمل معجزه
نساني كل اللي مضى من دنيتي
وبدأت اوثق كل لحظه ف دنيتك
واكتشفني من جديد
انا مش انا
لما إيديك بتضمني
مابقيتش عارفه ببقا مين
عصفوره طايره في السما
ولا فراشه ملونه
ولا حورية ف جنتك
قلبي ارتوى بمحبتك
والقلب عمران باليقين
آمنت بالله والقدر
حبك حياه واجمل قدر
أنقذني في وقت الخطر
قواني في قلب العجاف
وبقيت انام متطمنه
مابقيتش اخاف
حتى البعاد
ماقدرش يغلب حبنا
عايشين جمال الذكريات
بنعيد وبنزيد في اللي فات
من غير ملل
بيغازل الفرح الأمل
بقا فرصه للشوق ينتشي
واللهفه تحيي ودنا
نكتب ف أخبار الغرام
عن قصه حلوه بإسمنا
مين اللي قال إنك بعيد
يامسك فايح م الخلايا المغرمه
يا أرض فرحي والسما
في القلب مالك مملكه
دايب في روحي والحشا
أقربلي من نبض الوريد
