تحدث مطرب المهرجانات حسن شاكوش في بث مباشر عبر حسابة الرسمي على موقع التواصل الاجتماعي للصور والفيديوهات "انستجرام" عن تعرضه للعمل.
وقال شاكوش: "محدش كان بيحس أنا فيا أيه، أنا أتأذيت كتير جدا يا جماعة، والأذى ده كان ممكن يؤدى للموت، أنا اتعملي عمل بوقف الحال وأني صحتي تكون متدمرة".
اقرأ أيضا بيومي فؤاد يكشف أسرار لأول مرة في «أنا والقناع».. الليلة
وتابع :" بس الحمد لله لأني قريب من ربنا ما حصليش حاجة، ومش شرط علشان قريب من ربنا أني أكون بصلي، لأ أنا بقى لي كتير جدًا مش بصلي".
وأضاف حسن شاكوش:" ما كانش حد دريان بيا وأنا كراجل مطرب لو فيا هموم الدنيا كلها بطلع على المسرح يضحك ويرقص ويعمل كل حاجة علشان شغله وأكل عيشه وما ينفعش أدخل مشاكل خاصة في الشغل لأن الناس اللي جايبينك شغل ودافعين فلوس مالهمش دعوة بمشاكلك".
وواصل:" ليه باصين ليا في الفرحة اللي بفرحها، أنا كنت لاعب كورة بنام تحت المدرجات وكنت في السويس بشرب مياه تجيب فشل كلوي علشان مش معايا أجيب مياه معدنية، وربنا خلق الناس طبقات مش كل الناس طبقة واحدة وأنا مش في يوم وليلة بقيت حسن شاكوش وكان بقى لي 12 سنة بلعب كورة".
أشار حسن شاكوش عن معاناته قبل الشهرة:" وكنت بنام على الأسفلت وكان معايا كاوتش باتا بخيطه خمسين ألف مرة علشان ما كانش معايا، وعمري ما قلت لحد أديني جنيه".
واختتم حسن شاكوش:" لما بشوف حد معاه بقول يمكن ربنا كرمه علشان يصرف على حد مريض عنده وأنا مش بحب أطلع وأتكلم ومش عاوز أقول والدتي عندها كانسر ومش بحب الكلام ده ولما بشيل بحط في نفسي ومش بشتكي وعمري ما اشتكيت أني موجوع أو تعبان ولكني بعيط في أوضتي وكنت حاسس إن ربنا هيكرمني".
