صباح الخير يا بابا.. «كام ليلة عدت علينا وكام نهار عدى» .. مش ح أقول لك وحشتنى أوى.. مع انك وحشتنى أوى.. مش ح أقول لك كمان.. واحشانى حاجات كتير معاك.. فيه حاجات كتير صعب تتحط فى كلام إلا «لو كنت أمير.. من أمراء الحواديت».. خلى اللى بينا بينا واحنا اللى بينا كتير وكله جميل.. الحمد لله.. مش ح أقول لك انك دايما معايا.. إنت عارف.. ما انت دايما معايا.. الحمد لله.. إننا اتلاقينا .. وإن لقانا بيجرى فى دمنا.
الحمد لله إننا بنحب بعض وبنحس ببعض وبنفهم بعض وإن مزاجنا متوالف : مبسوطة إننا عرفنا نتفق وأحيانا نختلف بكل حب وتقدير : الحمد لله إن إحنا دايما متواصلين.
أما بعد،حبيبى بابا خلى بالك الجواب ده ليك أيوه بس احنا مش لوحدينا (اعتبرنى فاتحة السبيكر) وتعالى كده نفتكر سوا حاجات.. يمكن تفيد أو تمس أو تلهم غيرنا معانا.. زى ما انت كنت عادة بتعمل ، أنا مش فى شطارتك أكيد بس نيتى خير.. ف يا رب نيتى تشفع لى عايزة أتكلم معاك فى حاجات كتير بس خلينا نبتدى ب «قصص الحياة».. علشان عندى قصة معاك.. كنا زمان اتكلمنا عن البايوجرافى والأتوبايوجرافى: اللى هى القصص الذاتية اللى بيكتبها صاحبها .
وقصص الحياة اللى بيكتبها حد عن حد تانى واتكلمنا مره بردو فى فيلم «حكايات الغريب» ، اللى كنت كاتب أغانيه، واللى من إخراج إنعام محمد على، اتكلمنا عن النهاية بتاعة الفيلم
إن شخصية «الغريب».
ومن ناحية: كان كل حد شايفه بشكل ومن ناحية تانية: هو فينا كلنا واتكلمنا.. إن الحقيقة الكاملة ملك صاحبها أو إن المعنى فى بطن الشاعر وإن كل اللى بره الإنسان مهما كان غالبا.
بيشوف بس جزء منه بس بيشوف جزء.. ويكمل الباقى بخياله هو بتوقعاته هو، بآماله هو. أو بآلامه هو.. واتكلمنا.. إن قصص الحياة مهمة لأنها بتساعدنا على فهمنا لنفسنا .
ولبعضنا وبتساعدنا إننا نتعلم من أخطاءنا علشان يمكن نقدر نبقى ناس أجمل وانت رغم إنك زمان كتبت عن بداياتاك واتكلمت عنها لكنك دايما مختصر، بتتكلم عن محطات، لحظات نورت فى حياتك يمكن حد تانى يقدر يشوف منها حاجة تلهمه.. ماكنتش بتحب تحكى للناس عن حياتك العادية.. كنت تفضل.. إنك تكتب شعر.. وبحكمة ولباقة بتنقل الأحاديث لجوهرها المشترك وتبص لقدام.
ولو ضرورى الكلام.. كنت تتكلم عن رحلتك اللى ندهتك ومشوارك ورفاقك فى الشعر والغنا والفن بشكل عام بالنسبة لى قصة حيانك كتبتها بروحك فى شعرك ..من غير ما تختار.
وأنا اتعلمت ومازلت باتعلم من رحلتك اللى إحساسى بيها أكبر من قدرتى على الحكى عنها اتعلمت معاك من غير كلام ولا شرح اتعلمت من رحلتك نفسها إن اللى الإنسان يقدر يعمله يعمله..
وإنه على قد ما يقدر يطيب روحه.
ويهادى بخيرها للى حواليه.. بشغل حلو من القلب، بابتسامة، باستماع من القلب، بصحبة طيبة، بكلمة فيها خير، بنظرة فيها تواصل وتفهم، بحديث تأملاته رايحة جاية مش رايحة بس، بحب للدنيا وللمعرفة.. ولأن الإنسان تفاصيل كتيرة.
وله أوجه كتيرة، صعب نشوفه كله من خلال كتاب حتى لو كان هو اللى كاتبه مهم نعرف الناس وقصص حياتها وكفاحها وإخفاقاتها ونجاحاتها ومعاناتها ونتعاطف ونتفهم ونتعلم ونختلف ونتفق.. بس مش كل الحكايات تستحق إنها تتحكى، ومش كل القصص وبتتحكى بالحكى.
فيه قصص محتاجة للحكايات أيوة..وفى قصص شغل صاحبها بيحكيها ومش محتاجة أكتر من ده يتكلم ويعبر، انت غزلت كتير شعر وأغانى مسلسلات وأفلام ومسرحيات وأغانى حرة ونثر مقالات وقصص وسيناريوهات.
وأوبريتات وأوبرات ومسرحيات.. مخزون غزير وغنى وملهم أتمنى إن شعرك الجميل الكتير وغزلك المتنوع ده كله يوصل لكل اللى بيدوروا على الوصال زى ما كنت انت كمان دايما بتتمنى..
علشان قصتك تتواصل مع ناس ورا ناس بالطريقة اللى انت اخترتها ورسمت عمرك بيها.. ورَسَمِتْ معاك رحلتك أقرب صورة لقلبك بحبك يا بابا .. سلام لروحك الطيبة و لعملك الطيب
ح امشى أنا بقى وأسيبك ع السبيكر
إيه رأيك تختم انت بحدوتين من حواديتك اللى كلهم حلوين:
(1)
لو كنت أمير
«لو كنت أمير من أمراء الحواديت كنت ادى لكل فقير وفقيرة بيت بجنينة.. مليانة زهور وبعشة مليانة كتاكيت وأعلّق فوقه قمر بنور ونجوم لولى… فتافيت فتافيت ولو كنت أمير من أمراء الحواديت ، كنت أدّى لكل الأطفال الحلوين ألعاب .
قطر بقضبان.. فرشة ألوان.. ميه أو زيت ، وابنى لهم قصر على المالح من غير أبواب قصر بقبة لولى وقبة مرجان وأعلّق ع القبة أجراس فضة ومرمر ودهب ونحاس .
لوكنت أمير من أمراء الحواديت كنت ادى ل… وزرائى محاريت
علشان يشتغلوا بايديهم ويشوفوا ازاى
الأرض السمرا لما نحرتها كدة رايح جاى
بتطلع غلّة وبن وقطن وضل وشاى
وتطلع غاب نعمل منه الأرغول والناى
لكن قبل ده كلّه لو كنت أمير
من أمراء الحواديت
كنت ادّى لكل الناس
وردة وكتاب
وردة وكتاب
وكمان قبل ده كلّه
قبل ده كلّه
لو كنت أمير
من أمراء الحواديت
كنت أرفرف زى النسمة وادخل فى الحلق
وأقطّع نص لسنة الخلق
النص اللى مابيقولش الحق
علشان يتعلموا
امتى يقولوا أيوة
وامتى لأ
ده لوكنت أمير
من أمراء الحواديت»
(2)
كام ليلة عدت
«كام ليلة عدت علينا وكام نهار عدى
نتهد مدة وننهض مدة م الهدة
كام شمس مرت علينا وكام قمر مروا
والقلب صابر على قهره وعلى مره
ياعابر الدهر عيش واتصدى واتحدى
كام ليلة عدت علينا وكام نهار عدى
يا عابر الدهر ف ايديك تصنع المقادير
عيشها بكرامة انت قادر تبقى بيها جدير
غربل ميراثك وزيل شره وزيد الخير
واسعى بضمير لاجل خير ناسك وخير الغير
يبقى المصير خير وحب ورحمة ومودة
ياعابرالدهر عيش واتصدى واتحدى
كام ليلة عدت علينا وكام نهار عدى
مااحناش رعايا لراعى كلنا اصحاب دار
احرار سواسية اخوة وحقنا نختار
مين ريس البحر والدفة لفين تندار
ونصحح الخط لو يوم شط والا دار
والا ننهار لعار فى مراره نتردى
يا عابر الدهر عيش واتصدى واتحدى
كام ليلة عدت علينا وكام نهار عدى»
