- شريف عرفة حذف مشهد في فيلم بعد ما جهزته بسبب العادات والتقاليد المصرية
- أحمد زكي كان بيقيس عليا المشهد.. وفيلم "ولاد العم" خد مني دراسة رهيبة
خصص مهرجان الأقصر للسينما الأفريقية محاضرة (ماستر كلاس) لمهندس الديكور فوزي العوامري، يحكي فيها عن محطات في مشواره، وتجارب كانت مؤثرة في عمله بالسينما والمسلسلات، وأدار الندوة الناقد أحمد شوقي.
تحدث فوزي العوامري عن مهنته وحبه لها وذكرياته مع النجوم أحمد زكي ومحمود عبد العزيز وتنفيذه لأفلام "ولاد العم" و"أوقات فراغ" و"عمارة يعقوبيان"، وقال: " أنا كمهندس ديكور مسئول عن كل حاجة بتتشاف والجمهور هيشوفها ولا يسمح بالخطأ ومسئول عن الانطباعات اللي هياخدها الناس، ولا يصح مثلا سيدة خارجة من كارثة وحاطة ميك اب ولابسه شيك".
وتابع في حديثه: "مسئول عن تعبيرية المشهد وتفاصيله و بيئه العمل وفيلم ولاد العم خد منى دراسة رهيبة حتى لا يكون فيه أى خطأ"، وروى مهندس الديكور فوزى العوامرى، ذكرياته مع النجم الراحل محمود عبد العزيز ، قائلا:" اشتغلت مع محمود فى فيلمين القبطان و البحر بيضحك ليه، فيلم القبطان ، وكان قد اتصل بي مهندس الديكور أنسى أبو سيف وقال لي : يا فوزى أعمل الفيلم و خليك مهندس الديكور وإحنا بنعمل كل حاجه إلا خراب البيوت ووقفت بعد ما كنت رافض".
أما عن ذكرياته مع النجم الراحل أحمد زكي، في فيلم "اضحك الصورة تطلع حلوة" وفيلم "معالي الوزير"، قال: "أحمد زكي كان بيقيس عليا المشهد ويتابع رد فعلي فيه، وفي فيلم معالي الوزير كان هناك مشهد وهو بيطلع من الوازرة بيصور فى البروفة كلامه قاله بصوت محشرج فسألني : حلو المشهد ، وكان امام المخرج سمير سيف فقلت له : كويس ولكنه لمح علي وجهي علامات عدم الرضا ، فقال لي نعمله تانى وبعد المشهد قالى عاملتلك اللى أنت عاوزه".
وأردف في حديثه: "لكن فى فيلم أضحك الصورة تطلع حلوة منى زكى كانت عاوزه تلبس جينز ضيق فى مشهد دخولها الجامعة قولت ليها طبعا لا يجوز انتى من بيئة مختلفة عن المتواجدين فى الجامعة هتلبسى بنطلون جينز واسع، والمشهد الثانى لما أحمد زكى نزل يجيب المفتاح من حمام السباحة وطلع كله ملابسه مبلوله، عاملنا ديكور حمام طلع عنينا فيه مع شريف عرفة و أن أحمد زكى بينشف نفسه وسيدة تناوله المنشفه وحصل تلامس بينهما، وبعد التصوير شريف عرفة حذف المشهد لان الفيلم هيدخل البيوت المصرية وهو بيراعى العادات وبيحافظ على الذوق العام حتى لو الكاتب وحيد حامد ".
ثم انتقل فى كلامه عن فيلم أوقات فراغ، قائلا:" كان فى ولدين صغيرين مؤلفين عمر جمال و محمد مقبل محمد واحد ثانوية عامة و الثانى فى أولى جامعة 16 و 17 سنة ذهبوا وقتها لحسين القلا فى مكتبه كاتبين سيناريو فيلم أوقات فراغ فى كراسة خدهم وراهم السيناريوهات بتكتب ازاى وكلمنى وشوفت السيناريو قلت له نفسى فى حياتى اسمى يتحط على الفيلم ده وكان باين أن العمل ده مميز.
واستكمل حديثه، قائلا: "اتعرض عليا فيلم علاقات خاصة ولقيت فيه مشاهد متحررة ومنفلتة رفضته لأن إزاي لما ابني يكبر يشوف الفيلم هقوله إيه والفيلم ليس فيه أي مستوى فني".
وتحدث فوزي العوامري، عن فيلم عمارة يعقوبيان، وقال: "قبل التصوير لما روحت مع مروان حامد أشوف العمارة قلتله لازم تتغير كلها لأنها رغم أنها العمارة الحقيقية إلا أنها لا تعطي الإحساس، وفي فيلم السلم والثعبان عملت فيه الديكور والملابس".
واختتم فوزي ندوته قائلا: "الشغلانة حلوة والمهندسين الذين يعملون معي بينبسطوا مني أوي وأنا دائما بقول كلمة (مش عارف)، وأنت اللي بتسوق العمل وتعمله إزاي، وهدفي صناعة جيل جديد".
اقرأ أيضًا| خاص| محمد نور يكشف عن مفاجأة جديدة مع أحمد السقا.. فيديو
