« خربشة »

جميل أن يصرح أحمد دياب بأن الجديد فى المونديال تحت الدراسة لتطبيقه فى مصر..

بس وحياة الغاليين عندك ياحاج أحمد بلاش نعيش الدور قوى فى الوقت بدل الضائع لأننا لو طبقناه هنلعب كل مباراة ٣ ساعات وستكون فرصة للتلاعب وخدمة فرق وظلم أخرى ..

وعلى فكرة ياحاج أحمد فى المونديال فيه ربع ساعة وقت بدل ضائع وفيه دقيقتين ودقيقة ..

يعنى هو فى النهاية تقدير شخصى مش آلى ولا تكنولوجيا ومادام هو كذلك يبقى دوغرى كدة بلاش نطبقه عندنا لأن الحكشام لما بياخدوا تعليمات بيحبوا يتمنظروا بيها وهيضحكونا بفقراتهم الكوميدية..

لما الخواجة قال لهم  مش كل فاول يتحسب سابوا الحبل على الغارب ولما قال لهم الضرب من غير كرة طرد بقى كل لعبة فيها عنف غير متعمد الكارت الأحمر يطلع فورا  واحنا شايفين فى المونديال كلام تانى خالص.  ..وهفكرك بزمان لما كان الوقت بدل الضائع سر فى بطن الحكام ولاداعى لذكر أسماء من كانوا لايطلقون صافرة النهاية إلا لما البعبع يسجل وإلا هيتسجل هو فى قائمة الحجر فى البيت والحرق فى جهنم الإعلام والجمهور..

إحنا مينفعش معانا كل حاجة..إحنا ينفعنا شوية آلى  وشوية يدوي..ياحاج أحمد انت سيد العارفين أن مشكلتنا أننا بناخد كل إللى برة ندخله جوة ''عمياني''..

خلينا نفتح عنينا شوية ونلبس إللى على مقاسنا..