أعلنت الإعلامية دعاء فاروق، تقديمها بلاغًا ضد بلطجي اعتدى على زوجته وأبنائه، موضحة أن ذلك البلطجي هو زوج السيدة التي تعمل لديها بالمنزل "الخادمة".
وكتبت دعاء فاروق عبر حسابها على موقع فيسبوك: لحد امتي الستات هتفضل تتهان وتتمرمط ومحدش يعرف يجيب لها حقها.. رباب الست المحترمة اللي بتشتغل عندي بقالها 13 سنة ربت لي عيالي وصانت أكل عيشها معايا وحافظت على بيتي بمنتهي الأمانة، أشهد لها بالنضافة والأمانة والأدب والإخلاص والأخلاق، شقيانة طول عمرها عشان تربي بنتها وابنها أحسن تربية ومتجوزة بلطجي شمام بيضرب حشيش بفلوس شقاها وشغلها عندي.
تابعت: أنا هنزل أعمل فيه بلاغ حالا لأنه بيهددها بأنه يرمي في وشها ماية نار الضلالي اللي سرق عفشها كله ونقله على بيت أمه، وسرق جهاز بنتها العروسة اللي غصب عني مضطرة أقول إن أنا اللي بجهزها من عندي من المعارض سرق كل ده وطردهم من شقتهم اللي أنا آسفة إني مضطرة أقول إني بدفع لها إيجارها وتأمينها وبيهدد الست صاحبة البيت إنه عاوز التأمين وإلا هيفك موتور الماية وهياخده بلطجة كده.
و واضلت: «الست بتجيلي يوماتي جسمها أزرق من كتر الضرب اللي في جسمها وبيكتم بقها وبيعذبها حرفيا، بياخد فلوسها يشرب بيها حشيش ويضربها، ياما قلت لها اطلقي وامشي اطلقي وسيبيله كل حاجة وامشي تقوللي أخاف ياخد مني عيالي، دلوقتي رباب في غيبوبة سكر وعيالها كلموني بيستنجدوا بيا ومنهارين علي أمهم الشقيانة ومش طايقين أبوهم اللي راح يسحب ورق الولد من المدرسة مش عاوزه يتعلم وبيهددهم إنه هيحرق قلبهم علي أمهم».
واوضحت: «طيب يا راجل يا ضلالي ياللي سرقت عفش وجهاز بنتك اللي مراتك جايباه من شقاها انا هعمل بلاغ رسمي للجهات الرسمية فيك وهنزل حالا أجيب حق رباب بالقانون قبل ما تتقتل فطيس».
اختتمت: هلحق الجريمة قبل ما تحصل وبالمرة هروح أعمل محضر عدم تعرض لأنه أكتر من مرة يهددها إنه هيضايقني.. طيب يا بلطجي عصرك وأوانك أنا ببعت استغاثة للجهات الأمنية عشان أنقذ الست الغلبانة وعيالك الغلابة اللي بيكلموني مفطورين من العياط من بطشك وظلمك وقلة أدبك.
أقرأ ايضاً - 1.5 مليون في 48 ساعة| نانسي عجرم تواصل تحطيم الأرقام بأغنيتها "على شانك"
