تصدرت الفنانة شيرين عبد الوهاب تريند مواقع التواصل الاجتماعي المختلفة وكذلك موقع البحث الشهير جوجل بعد تصريحاتها النارية ضد طليقها الفنان حسام حبيب أمس في برنامج «كلمة أخيرة» مع الإعلامية لميس الحديدي.
وقالت الفنانة شيرين عبد الوهاب: «أريد أن أستغفر الله تعالى على الكذب اللي كذبته عشان أخلى صورة إنسان تبقى كويسة» في إشارة لزوجها السابق حسام حبيب.
وأضافت شيرين عبد الوهاب: «حسام حبيب ضربني وسحلني على الأرض وهو اللي حلق لي شعرى، وأنا عاوزة حقي منه»، مضيفة: «أنا بنت أصول وكنت عاوزة أرفع صورة إنسان ممكن يروح في يوم من الأيام يتجوز من عيلة تانية، ولو كنت قلت كلام وحش وقتها مكانش هيعرف يتجوز، وأنا نفسى يتجوز ويبعد عني».
وتابعت شيرين عبد الوهاب: «كنت عايشة مع زوج مش بيشتغل تقريبًا، ولا بيخرج ولا بيشوف أهله ولا أصحابه وكل همه حب الامتلاك، وكنت محبوسة 24 ساعة في أوضة نومي مش بعمل حاجة، قاعدة بس.. أنا كنت عايشة زي الفئران في المصيدة».
واتهمت شيرين عبد الوهاب، زوجها السابق حسام حبيب بسرقة سياراتها، قائلة: «حسام حبيب سرق العربية من قدام البيت مستغلا تواجدي في الساحل.. وكنت متكفلة بمصاريف بيته الثاني واللي فيه والد حسام حبيب ووالدته.. طول عمره ما بيشتغلش، وأهله باصين لي في كل حاجة».
وتابعت شيرين عبد الوهاب: «حسام حبيب طلب 10% من أرباح شغلي.. أنا اتجوز قرد وما أرجعش ليه تاني»، مؤكدة: «أنا أستاهل الضرب عشان طلعت قولت مابيخدش مني فلوس أنا آسفة للناس عشان كدبت عليهم، وهتعب عشان أرجع تاني شيرين اللي ضيعتها».
كما اتهمت شيرين عبد الوهاب، زوجها السابق حسام حبيب، بحمل السلاح وتهديدها، قائلة: «حسام حبيب حمل السلاح في وجهي وفي وجه بناتي.. عيالي كانوا هينضربوا بالرصاص، قبلها بيومين قاعدين في الأوضة، طلع من الدرج علبة فيها رصاص، وراح مديني رصاصة وقال لي خدي دي منى هدية!، والحمد لله إني لسه عايشة».
وأضافت: «اللي حصل بعد ما هديت من الكارثة حسيت إن أنا مش قادرة أستغنى عنه وأديله فرصة تانية، ورجعت فقولنا ندي فرصة تاني بشروط، وبناتي في بيت تاني ونشتغل، إلا أن الوعود ابتدت تتلاشى والمشاكل رجعت مرة أخرى»، مستطردة: «كل خناقة تحصل ما بينا يحرق دمي لحد ما أمسك المكنة وأحلق شعري».
رد حسام حبيب على شيرين عبد الوهاب
من جهته رد الفنان حسام حبيب، على التصريحات التي أدلت بها زوجته السابقة شيرين عبدالوهاب.
ونشر برنامج «et بالعربي»، على صفحته الرسمية على موقع التدوينات القصيرة «تويتر»، تسجيلا صوتيا لـ حسام حبيب، يرد فيه على تصريحات شيرين عبد الوهاب، مؤكدا أنه قرر اللجوء للإجراءات القانونية للحصول على حقه على إثر هذه التصريحات.
وأضاف حسام حبيب: «هيكون فيه إجراء قانوني.. أنا عمري ما دافعت عن نفسي.. الكلام اللي أنا هرد بيه كلام كله بوثائق، مش هقول كلام مرسل، كل حاجة دلوقتي بحضرها»، مستطردا: أنا كنت ساكت حفاظا على شيرين وسمعتها، وعلى بيتها.
