قالت ميرنا جميل، انها تشاهد مسلسل "راجعين يا هوي " و" الكبير أوي " و "المشوار "، ونالوا إعجابها بشكل كبير، وجاء ذلك خلال حوارها علي راديو هيتس.
وتحدثت ميرنا جميل، عن بدايتها ودراستها وقالت : "أنا كنت في "كلية ألسن " قسم " ألماني و انجلش " بس مليش أي علاقة بدراستي كنت بنجح بسبب المسرح، ودخلت " كلية ألسن " علشان ماما ، هي اللي اختارتها وهي اللي اختارت " الألماني" علشان أطلع مترجمة، و دخلت المسرح من أول يوم في الجامعة وبقيت البنت المشهورة و كنت كوميدي برضو.
وتابعت ميرنا جميل، "أخدت درجات أعمال السنة كاملة في الجامعة بسبب المسرح، وحلم التمثيل بدأ معايا من أيام المدرسة و كنت برسم ديكور و أزياء المسرح، و أول مرة دخلت شارع الفن كان في مركز الابداع الفني مع الأستاذ " خالد جلال" ، وجوايا دايما حاسه ان عندي هدف و طموح و البيت كان بيدعمني.
وعن المحطات في حياتي فأولها كانت snl، و أول مرة الناس عرفتني فيها و كانت مفاجأة بالنسبة ليا في مسرحية " بعد الليل " مع " خالد جلال"، و أهم نقلة في حياتي كان دور " وردة " في مسلسل " الحصان الأسود "، و من أحلى المسلسلات اللي اشتغلت فيها " خفة يد " مع الأستاذ " معتز التوني "، أما نقطة التحول في حياتي كان مسلسل " ربع رومي " ، المخرج كان بيدعمنا جدًا و كانت الناس في الشارع بتنادي عليا" بليلي مراد " اسم الشخصية في المسلسل.
واختتمت قائلة ، "الناس اللي معايا من أول الرحلة أهلي طبعًا وربنا دايما بيبعت لك ناس حلوين بيدعموك وواقفين في ضهرك وده بيفرق جدًا، وبحب مسلسل " اللعبة " جدًا و فرق معايا أوي وهي فرصة حلوه أي بنت تتمناها، و حاليًا بعمل " البيت بيتي " مع " خالد مرعي " و " كريم عبدالعزيز " " مصطفى خاطر " و هو " رعب كوميدي.
