تصدرت الفنانة ياسمين رئيس، تريند موقع البحث العالمي "جوجل" بعد تصريحات زوجها المخرج هادي الباجوري المثيرة للجدل والتي كشف عنها في برنامج "كلام الناس".
وقال هادي الباجوري، خلال لقائه مع الإعلامية ياسمين عز في برنامجها "كلام الناس" المذاع على "mbc مصر": "بوسة فيلم قمر 14 عادية جدا، والبوس كان عادي من 20 سنة وأنا مش هغير نفسي عشان الجمهور، هما اللي يتعالجوا والبوسة ليها حب ومعنى في الفيلم ومش زيادة عن السيناريو".
وواصل: "إحنا شعب غريب أوي والأفراح كلها رقاصات عادي، وإحنا شعب مركب وعندنا انفصام في الشخصية وبنحط راسنا في التراب وكل واحد حر يعمل اللي عايزه، واللي مش عاجبه ميتفرجش أحسن".
وذكر أنه لن يعترض على مشاركة زوجته الفنانة ياسمين رئيس في مشهد رومانسي، قائلا: "الممثلة اللي مش مستعدة للهجوم متشتغلش ممثلة أحسن، ومعنديش مشكلة ياسمين رئيس تعمل مشهد رومانسي في أعمالها، ومقدرش أقول غير كدا لأني بعمل مشاهد رومانسية وإزاي هقولها لا؟ هتقولي أنت منافق".
وتحدث "الباجوري"، عن علاقته بياسمين رئيس، قائلا: "إحنا عدينا بموقف صعب في أول دور عملته ياسمين رئيس معايا.. لكنها أثبتت نفسها بجدارة.. زوجتي شاطرة مش مستنية إن حد يقول عنها إنها مرات المخرج"، مردفا: "الناس دلوقتي بتقولي يا جوز الممثلة ودي حاجة بتبسطني جدا".
وأوضح المخرج هادي الباجوري: "نجاح ياسمين رئيس من نجاحي وبتبسط بأي حاجة بتعملها"، مشيرا: "الإنسان السوي والطبيعي بيكون مبسوط بنجاح زوجته".
رد المخرج هادي الباجوري على انتقادات الهجوم على مسلسل "البحث عن علا" بسبب ظهور الفنانة هند صبري ودينا ببدلة رقص بأحد مشاهد المسلسل، قائلا: "إحنا شعب يعاني من انفصام في الشخصية".
وقال: "مشوفتش تعليقات الجمهور حول بدلة الرقص في مسلسل البحث عن علا، ولكن هو مشهد حقيقي بيحصل في الواقع في قعدة بنات وصاحبتك تجبلك بدلة رقص، وشخصية علا كان نفسها تجرب حاجة جديدة وترقص فـ صاحبتها اللي بتقوم بـ دورها دينا جابتلها بدلة رقص عشان المشهد يتعمل صح".
وذكر: "أحنا شعب دافن راسه في التراب وعندنا انفصام في الشخصية والأحسن اللي مش عاجبه ميتفرجش إنما كدا أنتوا بتبوظوا شغلي وأنا بقيت أتجاهل أي تعليق بسبب كدا لأن الناس سابت نجاح المسلسل والقصة وركزت على بدلة الرقص، أنا مش شايف إيه المشكلة، ما ده بيحصل عادي، والناس بتمشي على البحر ب مايوهات عادي.. الجمهور لا يرى حجم المجهود الذي يتم بذله في الأعمال الفنية، ويتفرغون للهجوم فقط".
