- ما ردتش على طول ليه وسايبنى ارن يا صعيدي؟!
- عذرا مين معايا ؟
- وكمان معندكش خاصية «الترو كوولر « علشان تعرف مين بيطلبك؟
- طالعلى برايفت نامبر وبصراحة نصحنى صديق بعدم استخدامها لأنها بتسهل مراقبتنا !
- مراقبة ايه يابنى انت متعرفش ان التليفونات الذكية خلتكم فى بث مباشر ٢٤ ساعة.
- لا ماقصدش يافندم أصل بصراحة نفس الصديق شايف أننا متراقبين من كائنات فضائية !
- وهل الكائنات الفضائية تحتاج لخاصية التروكوولر لمراقبتكم؟!
- كنت هاقوله كده والله.. المهم مين حضرتك؟
- لحقت تنسى صوتى قوام كده؟
- هو بصراحة الصوت مش غريب عليا وواضح ان حضرتك بتتكلم من حتة غريبة بره مصر.
- مش بس بره مصر انا باتكلم من حتة بره الدنيا كلها!
- هههههههههه واضح ان حضرتك بتهزر؟!
- انت فاكر انك هاتصاحبنى لدرجة إنى أهزر معاك ياصعيدي؟!
- انا تقريبا عرفت حضرتك بس مش قادر اتخيل ازاى ده ممكن يحصل، معقولة تكون حضرتك الأستاذ الكبير احمد رجب!.. بس ازاى يافندم هو مش حضرتك برضه يعنى متأخذنيش!
- ايه قصدك تقول مت يعني؟ ياض يا نصاب انت مش انت كتبت فى رثائى إن اللى زيى عمره ما يموت ولا كان كلام جرايد وخلاص!
- فعلا فعلا اسف يافندم طبعا حضرتك عمرك ما تموت. بس هو يعنى حضرتك بتتكلم من أى مكان بالظبط؟.. اقصد يعنى حضرتك بإذن الله فى الجنة العادية ولا فى الفردوس الأعلي.
- هههههههههه الله يحظك، طلعت زكى المرة دى. عموما أنا متصل أقولك مبروك الجائزة الرابعة فى الكتابة الساخرة.
- ياه ياه ياه طب .. وحياتك فى الجنة بإذن الله ان المكالمة دى احلى من مليون جايزة.
- طيب يا سيدى كتر خيرك. قولى الحكومة الصغيرة وعيالك عاملين إيه؟
- بيبوسوا إيدين سعادتك.
- والحكومة الكبيرة عاملة معاكم إيه؟
- مبهدلانا يافندم فواتير كهرباء وغاز نار نار.
- يابنى الملافظ سعد.
- ههههههه اسف يافندم بس بصراحة مفتقدين نص كلمة كان زمانك شفيت غليلنا فى الحكومة وبالذات فى وزير المالية اللى بيتفنن فى اختراع رسوم وضرائب .
- البركة فيكم بقي، فاكر قولتلك إيه لما فزت أول مرة؟
- قولتلى أهم حاجة خليك دايما تلقائى وبلاش تكلف.
- تمام وانا بكرر نصيحتى لك دايما ولا فاكر نفسك كبرت على النصائح ولا تكونش فاكر انى اكمنى ميت تبقى انت اتربعت على عرش الكتابة الساخرة؟
- كان يتقطع لسانى ياكبير، أنا دايما باقول إن احمد رجب عندما رحل أخذ معه عرش الكتابة الساخرة!
- طب مش عايز حاجة قبل ما اقفل؟
- الله يرحمك يا أستاذ ويطولنا فى عمرك!
- مش باقولك هاتفضل صعيدى ههههههه سلام.
