علقت الفنانة رنا سماحة على أزمة الفنان هاني شاكر نقيب المهن الموسيقية، بعد قرار النقابة بمنع 19 من مطربي المهرجانات من الغناء.
وعبرت رنا سماحة عن رأيها من خلال منشور عبر حسابها الشخصي على موقع التواصل الاجتماعي "فيسبوك"، قائلةً: "رأي واحدة من جيل يستغيث.. أولًا في مسلمات لازم منتطرقش ليها أصلا.. وهي قاماتنا الفنية اللي لازم يكون لهم كامل الاحترام والتقدير الأستاذ الفنان هاني شاكر.. قامة فنية كبيرة وتاريخ يفتخر به الفن المصري والعربي مرفوض رفضًا تامًا من أي شخص إنه يقلل من قيمته.. ثانيًا يا جماعة ما اللي مبيفهمش في حاجة ميتكلمش فيها وخلاص.. يعني حضرتك ليك شغلانة معينة بتفهم فيها وناجح في مجالك من حقك تقول رأيك فيها براحتك.. لكن رأيك كواحد من الجمهور يقتصر فقط على اختيارك للنوع اللي بيعجبك وتسمعه براحتك في أي مكان زي ما أستاذ هاني شاكر قال.. الناس دي موجودة على يوتيوب تقدر تجيبهم في حفلاتك الخاصة براحتك لا حد قالك تسمعهم ولا متسمعهمش".
وأضافت رنا سماحة: لكن لما النقابة تقرر وقف أي حد مش مصرح له العمل ولم يخضع لقواعد وقوانين النقابة فده طبيعي في أي نقابة في الدنيا مش نقابتنا بس.. أما بقى عن فكرة الذوق العام في كل واحد فعلًا من حقه يسمع اللي بيحبه لكن لازم نقر كلنا إن في عوار في المزيكا في مصر.. الساحة الفنية فعليًا مش موجود عليها إلا كم فئة والباقي شبه مندثر.. فئة الـ mega stars، وفئة المهرجانات واللي شايفة نهم بدأوا يقلوا جماهيريًا، وفئة الراب والتراب ودي الفئة الغالبة جماهيريًا دلوقتي.. زي ما أستاذ عمرو أديب قال الناس بتسمع حاجه تانيه خالص ايوه مظبوط وبالرقام وده واقع لازم نقتنع بيه شئنا أم أبينا.. تعالى بقى شوف جيل الفنانين الشباب اللي زي حالاتنا.. هي دي الفئة الشبه مندثرة".
وتابعت: "ليه يا فندم ؟! أنا عايزة اسأل حضراتكم جميعًا ليه احنا مالناش مكان؟ ليه الفئة بتاعتنا أصبحت مهملة ومحدش بيفكر فيها؟! ليه مالناش بدايل للتواجد؟! ليه مبنلاقيش الدعم المناسب؟! يا فندم حضرتك في جيل فني كامل تايه ومش عارف يعمل إيه حد بيفكر فيهم؟! في جيل كامل بيسعى لوحده بزيرو إمكانيات وزيرو خبرة وزيرو دعم أعتقد دول اللي محتاجين نبصلهم شويه قبل ما ينقرضوا.. قبل ما تفكروا تمنعوا السائد والناجح غصب عننا.. يا ريت تفتحوا عينيكوا وتشوفوا وتعترفوا إن في جيل كامل لم يتلقى أي نوع من أنواع الدعم.. وبسببه انتشر ما تسمونه بالوباء لأنكم وقفتوا تطور.. وقفتوا تجديد.. بتدوروا على السهل والمكسب القريب فقط.. بتجروا ورا الترند وبتسعوا ورا الأكثر جدلًا حتى لو مالوش هوية.. احنا مش ضد أي جديد بيتقدم ومع كل نجاح بيحصل.. ولكن رفقًا بنا من فضلكم".
واختتمت رنا سماحة حديثها، بعدة هاشتاجات ذات معنى، ألا وهي: جيل يستغيث، نقابة المهن الموسيقية، ادعم هاني شاكر.
وأعلنت المهن الموسيقية، عن أسماء مطربين المهرجانات الممنوعين من العمل، وهم: حمو بيكا وحسن شاكوش وكزبرة وحنجرة، ومصطفى زكريا محمد علي وشهرته مسلم، بالإضافة الي ابو ليلة واحمد قاسم الشهير فيلو، واحمد موزة وحمو طيخة وعنبه وريشا كوستا وسمارة وشواحة وولاد سليم والعصابة، الزعيم وعلاء فيفتي، وفرقة الكعب العالي ومجدي شطه، ووزة مطرية وشكل وعمرو حاحا.
وأكد هاني شاكر نقيب الموسيقيين، أنه يمنع كل من ليس عضوا بالنقابة وغير مصرح له بالعمل لحين تصحيح أوضاعهم بالنقابة واجتياز الاختبارات.
