قاعدة ذهبية بتقول ان أكل مامته أحلى من أكل الشيف «بوراك» بذات نفسه فبلاش تدخلى فى الحتة دى وتصممى تفردى عضلاتك.. المعركة دى خسرانة
● هوانسان عملى مقضى حياته بخمس تى شيرتات وبنطلون جينز وقميصين لزوم الشغل وكوتشى و3 شرابات.. وبقاله كده 30 سنة، فمش محتاجة أقولك اوعى تتوقعى منه انه يلف معاكى على محلات أويستمتع معاكى بالشوبينج.. هوبيجيب كل لبسه فى عشر دقايق ده ان طوّل ..
وبالنسبة له كمية اللبس اللى عندك والشنط والجزم دى سفه وتبذير وممكن يتاجر فيهم وتعيشوا عيشة مليونيرات، يعنى مش هيصعب عليه انك معندكيش بوت فيه نفس درجة الشنطة.. هيبصلك بمنتهى الاشمئزاز.. ما تعصبيهوش بقي.. وهاتى البوت من وراه وارحمى نفسك وارحميه.
● ما تسأليهوش أسئلة محرجة زى تحب تيجى معايا عند ماما والا تخرج مع صحابك...؟؟
متفتكريش ان السؤال ده فخ لإن اجابته واضحة زى الشمس..
بينى وبينك السؤال ده ما يتسألش أصلاً.. واجابته لا يختلف عليها راجلين على وجه الكوكب ده..
ومش هفسر أكتر من كده..
يارب تكونى فهمت.
● أى ماتش لمحمد صلاح أهم من أى مشوار المفروض تعملوه سوا وماتشات ليفربول لازم تتشاف مباشر مهما كانت الظروف وياريت لو على القهوة مع صحابه وأى ماتش الأهلى هيلعبه هيتفرج عليه حتى لوبيلاعبوا كهرباء طلخا.. اقفلى على الموضوع ده بقى ..
● انسان بسيط جدا كل درجات الألوان تتلخص عنده فى الأبيض والأسود والأزرق .
مالوش بقى فى قاموس الألوان اللى انتى نازلاله بيه ده.
أكرملك ما تسأليهوش تفتكر البينك أحلى والا الكافية والا الموف بيليق على بشرتى أكتر،
هوغالباً هيقولك كلهم حلوين ولوربنا كرمه واختار لون وغلاوتك هو قال أسهل لون عرف ينطقه مش أكتر ولا أقل.. ولما تلبسيه فى البيت هيقولك مين اللى اختارلك اللون العجيب ده.. اسألى مها صاحبتك على الالوان عشان تفيدك..
● لوقولتى لجوزك مالك وقالك ولا حاجة
سيبيه براحته هو مش زينا بيعوز حد يتحايل عليه بدل المرة ألف.. هو بجد مش عايز يتكلم! وبيحتاج يقعد فى الكهف بتاعه قيمة اسبوع اسبوعين وبعدها هيفُك لوحده...
● مفيش راجل بيحب الزن.. يعنى قولتيله انكم محتاجين نجار يبقى خلاص مش لازم تفكريه كل 6 شهور انه لسه مجابش النجار لحد دلوقتي.. هو هيجيبه لوحده بس بلاش صربعة وزن !
● فى قاعدة ذهبية بتقول ان أكل مامته أحلى من أكل الشيف «بوراك» بذات نفسه فبلاش تدخلى فى الحتة دى وتصممى تفردى عضلاتك.. المعركة دى خسرانة خسرانة..
اعترفى ان أكل مامته حلو وابعدى نفسك عن المقارنة دى تماماً عشان الدنيا تمشي..
● انسان متصالح مع نفسه..
مش بيركز مين بيكتب ايه على الفيس بوك ولا بياخد الكلام على نفسه، ولا ليهم فى جو الخرزة الزرقا والحسد والعين. لو العربية اتدشدشت ما يقولش أصل محمود ركب معايا وحسدني. ولا هيفضح محمود ويجرسه على الفيس بوك زى ناس نعرفهم كويس مقتنعين ان البشرية كلها سايبين اللى وراهم واللى قدامهم عشان يركزوا فى حياة فُلانة وعلانة !
● لوقالك مبيحبش السوشى او التشاينيز أو الهندى أو أى حاجة.. ما تحاوليش عشان مش هيحبها لو كلها من ايدك برضه.. هتترمى.. خليكى فى الخضار باللحمة.. سهل ولذيذ واتهرس مليون مرة. ومفيهوش احتمالات للفشل ..
● لو بتعمليله تاج على الفيس بوك ومش بيعبرك.. اوعى تحرجى نفسك تانى .
بطلى جوال 5000 منشن.. مش هيرد.. طلعيه من دماغك واعملى تاج لدينا صاحبتك هترد فى ثانيتها.. مع اننا عارفين ان لو ولاء زميلته فى الشغل عملتله منشن هيرد فى جزء من الثانية فكبرى دماغك ومتنكديش على نفسك..
● لو بيجبلك هدية فى الفلانتين.. فا هو مش مقتنع
لوبيجيبلك هدية فى عيد جوازكوا، فا هو مش مقتنع ؛
لوبيديكى عيدية فا هو مش مقتنع؛
بس بيريحك وبيرحم نفسه من بوز يُقدر ب 7 متر وصلاحيته لمدة 3 سنين قابلة للتجديد !
● مفيش راجل بيفهم التحوير بتاعنا
اللى هو انت مش بتخرجنى خالص.. وانت مش بتحبني. الكلام اللى فى المطلق ده هيوديكوا سكة اللى يروح ما يرجعش!
هيقولك ما انا خرجتك يوم الخميس 2 يوليو سنة 2019 الساعة 8 بالليل وروحنا سينما وجبتلك من كنتاكى دينر بوكس وعلبتين كولسلو.. وقولتلك بحبك من 45 يوم ...
فا خليكى دُوغري.. وقوليله عايزاك تخرجني، ايه رأيك نتغدى بره.. الدُوغرى مفيش أحسن منه...
● الرجالة ملهمش فى جو التصوير كل دقيقتين بتاعنا ده..هو لو اتصور بيبيقى من غُلبه وعشان تنزلى من على ودنه..مش عشان حب التصوير فجأة.
● بلاش سيلفى مع راجل.. مش هتعجبك النتيجة.. مش هيعمل بوز البطة ولو عمله هيبقى بوز الديناصور.. بلاش أحسن.. مش خلاص خلصنا كل خناقاتنا وهنتخانق على التصوير!
● مفيش راجل بيموت فى الزيارات العائلية زى ما انتى فاكره.. دى مجاملات.. ولوعملتيها لوحدك يبقى كتر ألف خيرك وهيشيلهالك جمِيلة طول عمره..
● مفيش راجل بيحب المفاجآت.. الرجالة مش بتحب الورد.. الرجالة مش بتحب جو العيد ميلادات ولا أى احتفالات الا نسبة بسيطة جداً منهم تكاد تكون معدومة.. الكب كيك بيعصبه خليكى فاكرة النقطة دى كويس!..
● الراجل مالوش فى جو السربرايز بارتى ولا انك تجيبيله تورته ويهُف فى الشمعة.. ومفيش راجل بيحب يجيب دباديب ولا يتجابله دباديب لا فى خطوبة ولا فى غيره.. ده اهدار للمال العام والصراحة عنده حق..
● الراجل ممكن ما يركزش لو حاجة مش نضيفة.. بس كله كوم والعربية كوم.. اعتبرى نفسك قاعدة فى حضّانة أطفال حديثى الولادة ولو قدرتى تلبسى كيس بلاستيك فوق الجزمة البسي.. وعقّمى نفسك انتى والعيال قبل ما تركبوا هيحبك أووووي.. اوعى تاكلى اوتشربى فيها.. برضه هيحبك اوووووي.. واوعوا ترموا فيها فتلة....وبلاش ترزعى باب العربية أو شنطة العربية جامد يا اما هتودعى العربية دى وهتقضيها مواصلات لآخر يوم فى عمرك عشان مش هينسهالك..
● مفيش راجل بيحب الرغي.. مش هييجى يقولك أكلت ايه وشربت ايه وعملت كذا فى الخروجة.. دى حركاتنا احنا..
بالنسبة للرجالة الحمد لله ده أجمل رد لكل حاجة.. كلهم كده.. وده لا يمنع انه عادى يرغى مع زميلاته فى الشغل فخليكى فريش كده ومتركزيش..
● الرجالة ملهمش فى تفاصيلنا يعنى مش هيفرق مع راجل ان رضوى حامل وان ميار سابت شغلها أو ان نهى سابت البيت لجوزها وغِضبت عند أبوها.....كل ده بالنسبة له كلام فارغ..وصداع على الفاضي..
● اكبر جمِيلة ممكن تعمليها لراجل انك تسيبيه نايم على السرير وتديله الريموت وتشتركيله فى البى ان سبورتس، أهى دى بقى الهدايا والا بلاش.. دى بالنسبة له هتفرحه نفس فرحتك لو وداكى المالديفز فى فندق 7 ستارز!
● الراجل وهو مهاجر ممكن يحط هدومه كلها وجزمه فى كيس بلاستيك من بتوع كارفور.. انتى اللى بتاخدى الوزن كله.. ما تحوريش!
فا لوطالعين الساحل ممكن يكون حاطط لبسه فى جيب البنطلون.. انتى اللى مبهدلاه فى الشنط والشيل والحط!
● ايووون.. خروجة صحابه أجدع عنده من الخروج مع صحباتك المتجوزين وأجوازهم مليار مرة.. تعايشى وبطلى زن واخرجى مع صحباتك لوحدكم.
● الرجالة مالهمش فى التواريخ.. اللى هو؛ فاكر أول يوم اتقابلنا كان كام ميلادي؟ وأول مرة اتخانقنا كان كام هجري؟ وكنت لابسة ايه لما قابلتنى صدفة أول مره؟
الديتيلز دى بتصيبه بالإعياء وممكن يفشكل الجوازة كلها..هو مش فى امتحان ثانوية عامة.
● الراجل مش بياخد باله انك صبغتى شعرك الا لو كان شعرك اسود وبقى اورانج أو فوشيا.. لكن لو صبغتى بنى بندقى ولا هيعبرك من هنا لقرن جاي.. انتى نفسك مش ملاحظة الفرق يا بايخة.. اعترفى..
● الراجل عنده ان اللى يصحيه من النوم من المحرمات..ولو فكرتى تصحيه يبقى لسبب قهري.. بتولدى مثلا.. البيت لا قدر الله هيقع.. غير كده استني.. كلها 16 ساعة ويصحى من القيلولة بتاعته.. الدنيا ما طارتش..
● جو أصل مامتك ومامتى وخالتك وخالتى واختك واختي أخرته حاجة من الاتنين.. يا هيسيبلك البيت ويطفش.. يا انتى هتعيطى من كتر ما شديتوا سوا وهتباتى عند مامتك يا فالحة...فا بلاش منه..
● ما تغلطيش فى صحابه ولا فى قعدة القهوة.. الحاجات دى خط أحمر.. توقفى عندها وستوووب يا أمووورة!..
● تبقى لامؤاخذة فى الكلمة عبيطة لوقارنتى نفسك ببلاى استيشن او اكس بوكس او بولة استيميشن او بماتش الكلاسيكو..
او حطيتى نفسك فى مقارنة مع الأهلى او محمد صلاح...
واياكى تقترحى عليه انه يطنش ماتش أياً كان عشان يوصلك لمروة..
ولا تخيريه بين ماتش الأهلى وخروجة ليكم سوا !؟؟
لازم تبقى متأكدة من الاجابة.. وبرضه مش هفسّرلك اكتر من كده..
الرجالة أبسط مما تتخيلوا يا جماعة؛ احنا اللى تفاصيلنا كتير بزيادة!!
عرفتوا بقى يعنى ايه الرجالة من المريخ
كوكب دمااااااااااغ
ملحوظه لزم التنويه عنها.. مش شرط كل الصفات دى تتجمع فى كل راجل.. فى راجل فيه صفتين بس أوتلاتة....
بس لواتجمعت كل الصفات دى فى جوزك يبقى ده حظك بقى يا بنت المحظوظة.. ولازم تستنصحى وانتِ بتتعاملى معاه عشان تكسبيه.. وأظن بعد الكتالوج ده عدّانى العيب وأزح ...
