علقت الفنانه نشوي مصطفي عبر حسابها الرسمي على موقع التواصل الاجتماعي «فيس بوك» على واقعه تحرش ابنتها من قبل سائق سيارة نقل وآخرين كانوا بصحبته.
وكتبت نشوي مصطفي «يوم طويل فى نهاية اليوم أحب أقدم كل الشكر والامتنان لمعالى النائب العام وللفاضل رئيس نيابة الهرم وللفاضل وكيل نيابة الهرم».
وأضافت نشوى مصطفى « بلدنا عظيمة بشرفائها وشكراً جزيلاً وزارة الداخلية، احنا مسنودين عليكم والله كتر ألف خيركم، بالمناسبة الطرق الجديدة والكاميرات اللي فى كل مكان على الطرق والملصق الإلكترونى اكتشفت بالبرهان أنهم مش بس علشان يرصدوا مخالفات السرعة» .
وتابعت «الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل ومفيش أي فرصة لأى بلطجة، بسبب العظمة اللي الطرق بقت عليها الحمد لله تم القبض على العربية باللي كانو فيها فى أقل من أربع ساعات».
واستكملت «للأسف كلهم سنهم صغير، الهدف اتحقق انهم هما وغيرهم عرفوا إن مصر اختلفت وكله متسجل وأن عندنا عنين صاحية بتحمينا ومحدش فوق القانون، يمكن اخر سطر ده يزعل بعض الناس اللي طلبو منى انى استمر فى القضية».
وقالت الفنانة نشوى مصطفى «حرصاً على أمهات وأسر المتهمين وانهيارهم بأن ولادهم يتسجنوا انا وابتغاء مرضاة الله تنازلت عن القضية عملاً بمبدأ العفو عند المقدرة».
ودعت للمتهمين قائلة: « ربنا يهديهم، واللي طلبتوا من أهاليهم وهما بيعتذروا لبنتى أنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هى خمس سنوات طبقاً لقانون التحرش اللي أمر بتعديله سيادة الرئيس حفاظاً على حق بناتنا».
وواصلت كلامها «حاجة تانية مهمة مكنتش اعرفها، أنا بالمناسبة معملتش محضر، أنا بس كتبت بوست هنا، واللي اتحرك بالنيابة عنى كمواطنة مصرية إدارة الرصد والبيان والتوجيه بمكتب النائب العام، ودي إدارة موجودة مخصوص لمتابعة السوشيال ميديا وبيهتموا بأى مشكلة يكتبها اي مواطن وليهم ارقام تليفون نقدر نتواصل معاهم وهما اللي بيقوموا باخطار النيابات المختصة نيابة عن اى مراطن تعرض لمشكلة».
واختتمت «على فكرة انا اتنازلت عن الجزء اللي يخصنا لكن حق الدولة مش من حقى اتنازل عنه وهما عندهم مخالفات كتير، وتحيا مصر من كل قلبى».
وكانت الفنانة نشوى مصطفى قد أعلنت عن تعرض ابنتها للتحرش، قائلة "النهارده بنتى اتعرضت للتحرش من العربية دى وفضل يزنقوا عليها واترعبت وهى سايقة على كوبرى ناحية الهرم المنصورية وكلمتنى وهى مفزوعة قلت لها حاولى تصوريهم وعملو لها اشارات سافلة زي ماهو فى الصورة كده".
وأضافت: "الحمد لله ربنا ستر وبنتى موقعتش من على الكوبرى وهى مرعوبة من حجم العربية اللورى اللي بترهبها — حسبى الله ونعم الوكيل فيهم".
وتمكنت الأجهزة الأمنية بالجيزة، تحت إشراف اللواء مدحت فارس، مدير الإدارة العامة لمباحث الجيزة، من ضبط 3 أشخاص متهمين في واقعة التحرش بنجلة الفنانة نشوى مصطفى بمنطقة المنصورية في الهرم، وهم مالك السيارة، 37 سنة، والسائق 27 سنة، وتباع 18 سنة.
نجحت تحريات أجهزة الأمن، في تحديد هوية مالك السيارة التابعة لإحدى شركات توزيع المواد الغذائية، فضلا عن هوية مستقليها، حتى تمكنت من ضبطهم.
وكانت قد كشفت التحريات الأولية التي جرت تحت إشراف اللواء علاء فتحي، أن نجلة الفنانة نشوى مصطفى، تعرضت للتحرش بألفاظ وإشارات خادشة للحياء العام، من قبل 3 متهمين، هم سائق واثنان مرافقان له، كانوا يستقلون سيارة نقل بيضاء اللون تتبع إحدى الشركات، حيث أشاروا لها بحركات خارجة على الآداب العامة، بقصد مضايقتها وخدش حيائها.
وأعلنت الفنانة نشوى مصطفى تعرض نجلتها للتحرش من سيارة نقل أثناء استقلالها سيارتها على الطريق، مشيرًة إلى قيام مستقلي السيارة بعمل إشارات غير لائقة لنجلتها، وتضييق سائق السيارة عليها، مما أصابها بالفزع.
وكتبت نشوى مصطفى، عبر حسابها الشخصي على موقع التواصل الاجتماعي «فيس بوك»، «النهارده بنتى اتعرضت للتحرش من العربية دى، وفضل يزنقوا عليها واترهبت وهى سايقة على كوبرى ناحية الهرم المنصورية، وكلمتنى وهى مفزوعة، قلت لها حاولى تصوريهم وعملوا لها إشارات زي ماهو فى الصورة كده».
وأضافت الفنانة «الحمد لله ربنا ستر وبنتى موقعتش من على الكوبرى وهى مرعوبة من حجم العربية اللورى اللي بترهبها، حسبى الله ونعم الوكيل فيهم».
اقرأ أيضا| بعد تصدرها التريند.. تعرف على قصة التحرش بإبنة نشوى مصطفى
