إذا أردت أن تنضم إلى قائمة الأغنياء فى أشهر قليلة مطلوب منك فقط أن تشترى فيستاً لونه أخضر أو أصفر بـ٢٠ جنيها وبعدها تصدر لنفسك قراراً إنك أصبحت تعمل (سايس ) فى أى مكان تختاره فى أرض مصر ..الحكاية أبسط من البساطة ..هتقف فى أى شارع ويا سلام لو ربنا كرمك ووقفت فى منطقة مطاعم مثلاً ..كل الحكاية أنك هتقول لصاحب السيارة ٣ كلمات تبدأ بحمد الله على السلامة ..ثم ارجع شوية يا برنس .. وبعدين تقول كده زى الفل ياباشا ..أقل مبلغ من الممكن أن تحصل عليه من أى شخص لن يقل عن ٥ جنيهات إلا إذا وقفت فى منطقة يكون البيه السايس محدد التسعيرة الخاصة به ويمكن أن تصل التسعيرة إلى ٢٠جنيهاً ..
أنا مش عارف قانون السايس راح فين .. ولا مين بيشتغل مع مين ..اللى فهمته أن كل منطقة ليها ريس وهو المسئول عن توزيع السياس ومش عارف مقابل إيه أو بيدفع لمين ..ما علينا ..المهم أن دى أسهل شغلانة للنصب فى مصر ..حاجة كمان بتحصل ..فمثلاً لو سألت اللى واقف عن سبب أنه بيأخذ منك فلوس رغم أن الشارع ملكاً للشعب يقولك أنا بحافظ على عربيتك بدل ما حد ييجى يجرحها بمسمار ..يعنى لو ما دفعتش الـ ٥جنيهات ممكن ندفع ٥ آلاف جنيه علشان تعيد طلاء السيارة بعد ما يقوم اللهو الخفى بتجريحها لأنك لم تدفع الإتاوة .. سؤال ..هى الحكومة ممثلة فى الجهات التنفيذية عارفة الكلام ده ..الرد طبعا اه ..طب لما قانون السايس دخل حيز التنفيذ بعد مناقشات ساخنة فى البرلمان هو مش من الطبيعى أنه يتطبق .. على الأقل المواطن لو عرف أنه بيدفع فلوس للحكومة مقابل خدمة هيكون مبسوط ..ولكن لما يحس أنه بيدفع إتاوة ومحدش بيحميه هيبقى مش مبسوط ..الصراحة الواحد شاف بلاد كتير ومستحيل تشوف هذا المنظر بهذا الأسلوب إلا فى مصر ..الموضة الجديدة أن بياع المناديل وبياع البخور وناس تانى بقت متواجدة مع السايس يعنى الموضوع مبقاش على قد الخمسة جنيهات فقط ..الحل سهل جداً ومطلوب تدخل سريع لتقنين الأوضاع وإعادة السيادة على الشوارع للمحليات بضوابط وشروط تسمح بتطبيق القوانين قبل أن تخرج الظاهرة عن السيطرة مثلما حدث مع التوكتوك ..المواطن على استعداد يدفع مقابل الانتظار فى الأماكن المخصصة بشرط أن تقوم الحكومة بتحصيل المبالغ لأن المواطن على ثقة أن هذه الأموال سيتم استخدامها فى رصف الطرق والإنارة وخلافة بدلاً من أن يحصل عليها أناس يمارسون البلطجة على الشعب بطريقة مختلفة ..دعونا نتعامل مع الوضع على إنه مشكلة حقيقية تحتاج إلى حلول جذرية حتى لو كان هناك بعض المستفيدين اللى أنا وأنت عارفينها كويس بس عيب لما نقول ..شبكة الطرق المحترمة فى مصر تحتاج إلى أماكن انتظار حديثة وبرسوم تضمن للمواطن أنه سيدفع حق الدولة وليس إتاوة للسايس ومن يحميه ..دعونا نبدأ تطبيق القانون ليتماشى مع فكر وشكل الجمهورية الجديدة ..وتحيا مصر
