علق الفنان أشرف عبد الباقي، على رأي الفنان محمود عامر، بعدما حضر عرض مسرحية، "شمسية وأربع كراسي"، وأوضح تفاصيل دور مطرب المهرجانات حمو بيكا، الذي تعرض لهجوم شديد بسبب مشاركته في المسرحية.
وكتب أشرف عبد الباقي، في تعليق، "الاستاذ المحترم محمود عامر، بشكرك جدًا وبعتذر لك عن القلق اللي سببته لك وبحترم كل رأي من أصدقاء علي صفحتك حتي لو كلامهم ممكن يضايق اكيد هما غيورين علي مهنتهم واحترامهم للمسرح وخايفين علي المهنة اللي بيحبوها واكيد هبقي سعيد جدا لو اتيحت لهم الفرصة ونورونا في المسرح وشافوا عدد البيوت المفتوحة لما مسرح بيشتغل من ممثلين وعمال ديكور واضاءة وصوت وبلاسيرات وادارة مسرحية وبوفيه وغيره كتير واكيد هايتبسطوا لما يشوفوا فنان بيحط الفلوس اللي كسبها من مهنته في عمل فني ( حتي لو اختلفنا عليه) بدل مايحطها في مطعم او في بنك ويستني الفوايد".
وأضاف أشرف عبد الباقي: "وبشكرك جدا انك صدقت وجهة نظري قبل ماتنورونا امبارح وتتأكد منها بالمناسبة في خلال ٨ سنين عملت ١٣٠ مسرحية من مسرح مصر اكيد فيه منهم يعجب ناس وغيره مايعجبهمش وانتجت مسرحية علي بابا للاطفال ( عرض ضخم) والحمد لله خسر ماديا وكملت عملت مسرح عرايس ونفذته في تشيك وجبت مدربين من اتشيك لتدريب شباب في مصر لتحريك وتنفيذ العرائس وعملت مسرح السعودية ونفذت ٢٠ مسرحية وعملت مسرحية جريمة في المعادي اللي اخذت حقوقها من انجلترا واتعرضت بشباب جداد ٤٠ واحد علي فرقتين ومسرحية صباحية مباركة وسيت كوم علي المسرح ( اللوكاندة) واخيرا شمسية واربع كراسي في مسرح الساحل".
وتابع عبد الباقي: "والغريبة إن بعض الفنانين بينتقدوا لسه مسرح مصر ( وطبعا ده حقهم ) اللي خلص من سنتين بدل مايقدموا اللي شايفين انه صح ( ودي شغلتهم ) بحترم رأيكم جدا وبعتذر عن الاطالة".
مسرحية شمسية وأربع كراسي من بطولة "أشرف عبد الباقي، محمد عبد الرحمن توتا، محمد أنور، محمد أسامة أوس أوس، ميرهان حسين" ومن تأليف كريم سامي، إخراج أشرف عبد الباقي.
