علق المجند أيمن قنديل المجند الذي قابله الرئيس عبدالفتاح السيسي بالعلمين على تسلمه هدية الرئيس وهي عقد ملكية مكتبة جديدة قائلاً: "كنت متأكد بنسبة مليون في الميه إن الرئيس سوف يحقق لي مطلبي بالطبع".
وحول مشاعره عندما قاد العجلة بجوار الرئيس السيسي، تابع في مداخلة هاتفيه خلال برنامج "كلمة أخيرة"، الذي تقدمه الإعلامية لميس الحديدي على شاشة "ON" قائلاً: " لو قعدت من هنا للسنة الجاية مش هعرف أوصف مشاعري أني سقت العجلة بجوار الرئيس السيسي".
أكمل: "في بداية اللقاء اتخضيت ومكنتش حاسس بنفسي لما الرئيس قالي سلام عليكم الكرسي بتاع العجلة بتاعك واطي ليه كده؟ فعليناه وقالي تعالى هات عجلتك وسابقني وسألني عن اسمي قلتله "أيمن"، وقالي سابقني، ولما اتكلم معايا قالي أنت مكسوف مني؟، أنا زي والدك ثلاث مرات، فهديت وأخدت نفس وبدأت أتكلم معاه ببساطة".
اقرأ أيضاً| لميس الحديدي عن امتلاء الشواطئ بالمصيفين: «الناس فوق بعضها»
وأضاف أيمن قنديل: "الخضة في الأول ده طبيعي، لأني بقابل رئيس الجمهورية وماكنتش أحلم بحاجة زي دي.. ولما قالي نفسك في إيه؟، فضلت للحظات مش عارف أقول حاجة لحد ما حكتله عن مشروعي الصغير، وإزاي نفسي أكبره، وسألني في مكان معين كويس؟ قلتله فيه مكان كويس وشغال.. والحمد لله".
وتابع: "أول تليفون عملته بعد لقاء الرئيس كلمت والدي وحكتله ومكنتش عارف أقوله إيه؟ مكنش هيصدقني بس أنا كلمته في نص الليل وده وقت متأخر عندنا في منطقة العامرية في الإسكندرية، وسألني فيه حاجة يعني؟ قلتله لا تمام، الرئيس اتكلم معايا وسألني محتاج حاجة؟، وقولتله الرئيس بيسلم عليك وفعلاً الرئيس بعتله السلام.
