خلاص. ستبدأ وزارة الداخلية تفعيل قانون المرور الجديد وتطبيق العقوبات القانونية على أصحاب السيارات التي امتنعت عن تركيب الملصق الالكترونى أو قامت بنزعه من مكانه أو اتلافه أو اخفائه.
وعلى الله تتمسك مخالفة بسبب هذا الملصق لأن العقوبات ستكون سحب الرخصة لفترات!! وغرامة بالمئات!! والحبس بالشهور!! يعنى المخالف بالملصق الالكترونى (هايتروق) ترويقة محترمة!
وهذا الملصق اللازقة أول ما هل علينا كان بـ ١٠٠ جنيه ثم زاد لـ ١٧٥ وبدل ما كان ثمنه يدفع مرة واحدة أصبح ثمنه يدفع كل سنة.. والمفروض أن الملصق يضبط لنا الحرامية اللى بيسرقوا العربيات.. واللى ما جددوش الرخص. وبيانات العربيات وأصحابها تطلع على وش الدنيا فى ثانية.. لكن الواقع.. لا عمرى عديت على سيارة مجهزة لقراءة الملصق.. ولا شوفت كمبيوتر فى ايد حضرة الأمين. وكل الكمائن فى كل الأماكن.. لسه بتفتش على الرخص بالنظام اليدوى المعتاد.. يعنى المهم اننا نلزق الملصق.. لكن مش مهم نفعله.
ولو كانت كل الحكاية هى فنكوش الملصق الالكترونى وبس.. فاحنا موافقين!!
لكن.. الخوف كله بقى وانت بترخص عربيتك من المثلث وشنطة الاسعافات والصديرى الفسفوري!!! لأنك هتدفع مقابلهم مئات الجنيهات حتى (لو معاك منهم) وهتكشف بالعافية على حالة الموتور والكاوتش.. برغم ان نفس المرور توجد به لافتة طول بعرض مكتوب فيها هذه الأشياء (اختيارى) ولكن... هتشترى وتكشف غصب عنك.. وإلا لا أنت مرخص عربيتك ولا ماشى من المرور فى سنتك البيضا.
يعنى... الملصق الالكترونى ورضينا بيه.. يمكن يتفعل فى يوم من الأيام.. لكن توابعه الجهنمية من مشتريات وفحوصات غير اجبارية تتكلف ضعف الترخيص نفسه. وكمان لا تدخل خزينة الدولة وإنما لحساب شركات خاصة، غير مقبول بالمرة!!
عزيزى قائد السيارة.. مش مهم تمشى بدون لوحات معدنية أو تركب زجاج فيميه وتمشى فى الشارع ترازى فى خلق الله بعربيتك!.. لكن المهم انك تكون مركب الملصق الالكترونى!!
