ربنا يتولانا !

رمضان كريم..كل سنة وانتو طيبين..بيفضل الشهر الكريم من احلى شهور السنة..لكن دايما بيبقى جوايا زى ما بيتقال حتة قلق من اللى مستنينى ومستنى غيرى من معشر الرجال مع استقبال رمضان من ست البيت بسبب لستة الطلبات اللى ملهاش اول ولا اخر ولحد دلوقتى مش عارف ليه مع ان المفترض فى رمضان مبيبقاش كم الاكل زى اى ايام عادية خصوصا وان السحور معروف الأكل فى إيه شوية فول وزبادى وشكرا.
وطبعا حصل اللى حصل..وقبل استقبال الشهر لقيت بناتى عمالين رايحين جايين يصحونى من النوم وكل شوية ياللا رايحين الماركت قوم البس..وخصوصا البت آسيا الصغيرة رايح جاى قوم بسرعة وتبصلى وتضحك وكانها عايزة تقولى هتتنفخ انهاردة.
فى الطريق طبعا للماركت عمال أتكلم على المسرفين وحرام اللى بيعملوه واعدد الامثلة والمواقف واللى حصل..وطبعا الاستجابة كانت غير عادية والحمدلله طمنت نفسى إن الدنيا هتبقى سهلة.
يا دوب دخلنا الماركت مفيش رف متاخدش منه حاجة..حتى اللى أنا مش فاهمه ده إيه كان بيحصل حتى البنات الصغيرة اللى مش فاهمة حاجة كانت بتتبرع تحط فى عربية الماركت.
جيت على الكاشير الوحيد اللى كان حاسس بيا فى الوقت ده وعمال يبصلى وهو نفسه يقولى ربنا يتولاك.
خلصنا الماركت وانا جالى بركان كدة صداع قولتلهم ياللا على البيت..لقيت الست هانم بتقول لا لسه الحلو هنعدى نجهز حاجة الحلو فى رمضان، وكان كان هيغمى عليا اول ما سمعت إن فى مكان تانى لسه.
الحمدلله اتسدت نفس الواحد عن سحور أول يوم رمضان وقلت والله مانا واكل..وفعلا محدش مسك فيا فى معلقة زبادى حتي..وصحيت تانى يوم بطنى بتتقطع من الجوع لحد ما الوقت عدى على الفطار ودخلت التهمت الفطار بس لقيت الهانم بتقول متاكلش كتير كده لان الناس فى ايام رمضان بتاكل أقل من الايام العادية!!.