شهرزاد

يا عظمة ستاتك يا حضارتنا

د. رانيا يحيى
د. رانيا يحيى

احتفالية نقل المومياوات خلتنا نفرح أوى ببلدنا ونفتخر بيها،ونتباهى بعظمتها وروعتها دلوقتى وكمان لحضارة عمرها أكتر من 7000 سنة،واللى يخلينا كستات مصريات عندنا كبرياء وزهو أدام العالم كله، إن الموكب الرائع دا كان فيه أربع ملكات،عارفين يعنى إيه؟؟ يعنى فى بلاد حوالينا عمرها مكملش 100 سنة!! لكن احنا دولة تاريخ وحضارة عريقة وأصيلة وعلمت العالم كله،علمتهم علوم وفنون وطب وفلك،وعلمتهم كمان يعنى إيه ست مصرية تقدر تحكم دولة كبيرة وتقود جيوشا وتنتصر،الست فى حضارة أجدادنا كان لها كل التقدير والاحترام وكان بيتعمل لها ألف حساب،وأما نشوف نقوش المعابد وجدرانها نلاقى تماثيل الملوك جنبها زوجاتهم اللى كانت بتتقدر مش علشان زوجة الملك أو الحاكم وبس ولكن لرجاحة عقلها وحكمتها وفكرها.
مصر يا ناس بجد علمت الإنسانية وقدرت الست المصرية،حضارتنا عرفت قيمتها وادتها صلاحيات ومكتسبات النهاردة بترجع لها تانى فى عهد رئيس مؤمن بدور الست المصرية ومقدرها،حضارتنا ساوت بين الست والراجل وربطتهم برباط مقدس وكانت بتتدفن معاه علشان تفضل معاه بعد البعث،كمان ادتها كامل حقوقها فى التشريعات زى الميراث وحقوق وواجبات الجواز،وعند التطليق من غير سبب تاخد تلت اللى بيملكه جوزها،مش بس!! لكن شفناها فى القضا وكبيرة الكهنة وشفناها ملكة الحكمة،وإيزيس رمز الوفاء والإخلاص،وحتحور إلهة الحب،وسخمت إلهة القوة،وماعت إلهة العدل.
هى دى الست المصرية اللى انا فخورة إنى أكون واحدة منهن،عايزين نتعلم من أجدادنا وكل راجل يشوف بيتعامل ازاى مع مراته ويشوف هو فين من الحضارة دى،إن كنا بنفتخر بيها ومؤمنين بتقدمها وازدهارها علينا نطبق فكرها اللى أذهل العالم كله ومحيرهم لغاية دلوقتى.. هى دى مصر افهموها بقى.

 

 

 

 

 

 

احمد جلال

جمال الشناوي