أكد نجم النادي الأهلي محمد مجدي أفشة، قائلا: «كنت حاسس إني هجيب جون فى المباراة كنت بصلي طول اليوم وبدعي، ودي لحظة تاريخية لن تتكر في حياتي».
وحول تأثير غيابات إصابات كورونا على المبارة قال أفشة، خلال لقائه مع لميس الحديدي: «كلنا كنا قلقانين من كورونا، لكن بالنسبة للماتش كنا عاملين معسكر من قبل المباراة بأسبوع واللاعيبة كلهم جاهزين وكنا بنتمرن كويس والنادي وفرلنا كل شيء، وأنا مكنتش بنام بسبب الكورونا، ومكنتش بنام كنت بفضل صاحي لتاني يوم، خايف من المسحة، لإن الواحد لما يعمل حاجة طول السنة ويجي في اللحظة الأخيرة يفاجأ بحاجة زي دي بيقلق خاصة المسحة الأخيرة لإن ليها علاقة ببطولة إفريقيا».
وواصل: «ديانج وصالح جمعة وكابتن وليد غابوا عن الماتش وكنت بكلمهم كلهم قبل الماتش حتى لاعبي الزمالك الونش وجمعة وأوباما مش معايا رقمه بس اطمنت عليه عن طريق عبد الله جمعة، وكنت زعلان علشانهم جداً وده مرض ومش بتمنى لحد ده».
وحول تأثير الغياب وجهود موسيماني قال: «ديانج لاعب كبير وغيابه مؤثر بس الكورة عمرها متوقف على حد لإن الكرة لعبة جماعية .. وموسيماني مدرب عبقري ومش هقول كويس لكن عبقري لإنه مذاكر كويس وعمل تغيير بين الشوطين وشايفه عبقري وإحنا ذاكرنا الزمالك مفيش لاعب في الزمالك غير مشفنا لعبه، وده مش عيب احترام الخصم مهم واحترامه مهم بنتفرج على لاعبية الزمالك بموبايلاتنا».
وكشف أفشة، أنه تحدث مع موسيماني قبيل المباراة قائلاً: «تحدثت معه وجبت المترجم لإني في الإنجليزي الحمد لله مفيش وهو بيعلمني إنجليزي وأنا بعلمه عربي وعلمته من واحد لعشرة باللغة العربية».
وتابع: «سألني انت قلقان؟ قلتله لا مش قلقان بس أنا لازم أحترم اللي قدامي فرد، قائلاً: أنا جاي الأهلي أعمل تاريخ، وانت معايا هعمل تاريخ ولما قالي الكلمة دي سكت وسيبته ومشيت هقول إيه؟ دي هيا العبقرية يعرف يطلع من اللاعب أحسن ماعنده».
