وجهت الإعلامية رضوى الشربينى، رسالة إلى الفتيات التي تتغير في تعاملها مع صديقاتها بعد الخطوبة، قائلة: "مجموعة من البنات مضايقين من واحدة صاحبتهم فجأة اتخطبت ونزلت صور خطيبها وعلى وشه قلب، عشان متعرفش الناس هي اتخطبت لمين، وتكتب أخيرا أملكه"، مشيرة إلى أن صديقات الفتاة أعربوا عن غضبهن من صديقتهن، لتخوفها من التعرض للحسد.
وتابعت رضوى الشربينى خلال برنامج "هي وبس"، المذاع على قناة cbc سفرة، اليوم الجمعة: "اللى بتقول أخيرا بقى ملكى، هو مكنش عليه رهن، دا مواطن عادى وبنتخطب ونتجوز، وليه بتتصوروا مع خطابكم وأحبابكم وعلى وشه قلب، خايفة عليه من الحسد ومش خايفة عليه".
وواصلت قائلة: "لما أجى أحب وأتخطب وأتجوز على سنة الله ورسوله ماقولش للناس، ممكن دارى على شمعتك تقيد في الشغل أو بداية العلاقة، لكن الخطوبة مش هيتخطف أو يتحسد"، مردفة: "واحدة هتيجى تلعب عليه وراح لها يبقى المشكلة فيه أكتر ما فيها، الاتنين مع السلامة، هتبقى صاحبتك خاينة وهو بيروح لأى واحدة".
وأشارت "الشربينى"، إلى أن الخوف من الحسد على السوشيال ميديا يكون للأطفال فقط، مستطردة: "بتعملوا حاجات غريبة بإنكم مش عاوزين تكتشفوهم قبل الجواز".
