- حاطة السماعات من الصبح بتسمعى إيه يا أمينة؟
- سقف ماتسخفش يا سى السيد!
- اتكلمى عدل بدال ما اقوم اسقف على صداغك! انا باسألك بتسمعى مين؟
- وانا باجاوب وباقولك سقف ماتسخفش يا سى السيد!
- اللهم طولك يا روح، يا ولية ردى عدل ردت الميه فى زورك.
- صدقنى يا سى السيد دى الاغنية اللى انا باسمعها ولو سمحت دلوقتى سقف وما تسخفش!
- انتى بتشتغلينى يا ولية انتى طب لو بتتكلمى جد قوليلى الاغنية دى مين بيغنيها؟
- اسمه رامى جمال ياخويا.
- هو ساب الكورة وراح يغنى؟
- كورة إيه بس يا سى السيد. رامى عمره ما كان لعيب يكونش قصدك شاكوش؟
- فعلا انا محتاج شاكوش افتحلك بيه نافوخك عشان تتعدلى معايا، شاكوش إيه يا ولية يا خرفانة انتى؟
- شاكوش يا خويا المطرب اللى اغنيته مكسرة الدنيا دى بيقولوا عاملة فرند فى العالم.
- اسمه تريند يا جاهلة.. باقولك ايه أنا مش فاضيلك، شيلى السماعات دى وقومى اعمليلنا حاجة ناكلها على العشا.
- حاضر يا سى السيد بس أحب على يدك مش عايزاك تتضايق سقف وما تسخفش وحياة ولادك يا شيخ! دى اغنية معمولة للمحبطين يا سى السيد عشان يعنى تديهم كرعة أمل وتفاؤل!
- هههههههه الله يحظك يا امينة اسمها جرعة، لكن ممكن أعرف انتى محبطة من إيه؟ هو فيه حاجة ناقصاكى؟
- طول عمرك فاكر إن الست مننا مش عايزة من جوزها غير طلبات البيت، لا ياخويا الحياة مش كده بس مين يفهم؟
- طيب حاتقومى تعملى الأكل ولا تحبى أديكى كرعتين تلاتة يفوقوكى؟ هههههه قال كرعة قال.
- خلاص خلاص بس الله يكرمك سقف ولا تسخفش ومفيش داعى تطلعنى من المول الحلو اللى أنا فيه.
- يا ولية اولا اسمه مود مش مول ثانيا ممكن أعرف الأغنية بتاعتك دى حاتخلص امتى؟
- ماتيجى تسمعها معايا بدال مانت قاعد تتريق كده!
- انا الحق عليا اللى دخلت النت فى البيت وكمان جايبلك موبايل تاتش وآدى النتيجة سيبانى وعمالة تسمعى شاكوش وبيكا، ايييييه فين أيام الفن الجميل؟
- أيوه اعملى نفسك من إللى بيسمعوا موسيقى بيرهوفن، قال زمن الفن الجميل قال يكونش قصدك فن زبيدة وجليلة العوالم بتوعك!
- أولا اسمه بتهوفن، ثانيا جليلة وزبيدة دلوقتى سابوا الرقص وبقوا فنانين على مستوى عالى وبيقدموا برامج فى التليفزيون.
- طب هدى أعضاءك بس يا سى السيد وسيبنى أخلص اغنية بنت الجيران واقوم على طول، على فكرة بقى لو سمعتها حاتعجبك أوى.. خد كده اسمعه وهو بيقول تسيبنى أكره حياتى وسنينى أتوه ومش حتلاقينى واشرب خمور وحشيش!
- اللهم طولك يا روح، يا ولية أنا ماصدقت ربنا تاب عليا من المنكر ده تقومى انتى تسمعى اغنية فيها الحاجات دى؟
- يا سى السيد خليك عصرى هو ده كلام الأغانى اليومين دول.
- على فكرة بقى انتى ست أى كلام!
- الله؟ مانت حلو اهو يا سى السيد ما هى دى اغنية تميم يونس اللى كسرت الدنيا؟ قولهالى كده كمان مرة؟
- أنتى أى كلام انتى اى كلام؟!
- وانت غبى وعبيط كمان ياللى فيك وفى الحيطان!
- قصدك مين يا أمينة؟
- يوه دى أكيد اغنية جديدة يا سى السيد.
- ظلمتك يا أمينة.. صحيح يا ولاد إللى مايعرفش كلمات الأغانى الجديدة يقول انك بتهزئينى وكنت زمانى روحتك لأمك!
- ماعاش اللى يهزأك يا سيد الرجالة بس أهم حاجة يا سى السيد دلوقتى سيبنى أعمل دماغ أغانى عشان أعرف أعملك أكل بمزاج وروح انت خدلك جنب وسقف ما تنَّحش ياخويا!
