فيديو| ريهام سعيد تعتزل الإعلام والفن: «كفاية بهدلة تعبت خلاص»

ريهام سعيد تقرر اعتزال الإعلام والفن
ريهام سعيد تقرر اعتزال الإعلام والفن

نشرت الإعلامية ريهام سعيد، فيديو عبر صفحتها الرسمية على موقع التواصل الاجتماعي "فيسبوك"، وذلك تعليقاً على قرار وقفها على خلفية التصريحات التي أدلت بها حول "مرضى السمنة".

وقالت ريهام في الفيديو: "بما إن هناك حملة ممنهجة من خلال المواقع اللي بتنزل كل ٣ دقائق حاجة من الصبح تقوّم بيها الناس عليّ، فمجرد أن يقرأ أحد أنني أهنت الناس البدنية ومرضى السمنة، وبما إننا شعب بيكسل يقرأ ويشوف، فبيصدق على طول ويزيط مع الزيطة ومش مهم بقى الست دي حالها وعيالها".

وأضافت ريهام بنبرة غاضبة: "مش مهم بقى، مش مهم نكذب ونصدق الكذبة، المهم إن أي حد ساهم في وقفي النهاردة من الصحفيين والمواقع هم ناس بتكذب لأني مقلتش ولا حاجة.. والله العظيم ما قلت ولا حاجة.. كل الناس اللي بتكتب تعليقات تحت الأخبار في المواقع واضح إنها سامعة وحافظة مش فاهمة".

واستنكرت ريهام من هاجموها قائلة: "مفيش حد شاف الحلقة، مفيش حد شاف أنا قلت إيه، كل الناس بتردد لبعض كلام أنا ما قلتوش.. كل اللي قلته إن التخين شكله مش حلو ومش قادر يمشي على رجليه وعايش ميت.. في واحدة كاتبة إني قلت ملهوش حق في الحياة، وناس تقول إني أهنتهم.. لكن كلمة عايشين ميتين دي هم اللي قالوهالي، وبتكلم على الناس اللي فوق الـ٢٠٠ و٢٥٠ كيلو".

وواصلت: "أنا بعتذر لكل الناس اللي زعلت مني عن سوء فهم لأني لم أقصد إني أهين أي حد.. ومش بعتذر عشان أرجع للشاشة تاني، أنا خلاص مش هشتغل في الإعلام تاني ولا التمثيل تاني، لأن أخطر حاجة على مريض السمنة وكل حاجة هو الضغط، وأنا بقالي ١٦ سنة مضغوطة".

واستطردت ريهام: "جاء الوقت اللي أرتاح فيه وأقعد مع أولادي وأخلي بالي منهم وأقعد مع جوزي ونقرب من ربنا.. ١٦ سنة بخدم الناس بس ونايمة بفكر مين عايز فلوس.. مين عايز كيس دم، ومعملتش فلوس وكانت نيتي خالصة لله سبحانه وتعالى، عمري ما تربحت مرة ولا أخدت فلوس مرة.. عشت بضمير حي وراس مرفوعة".

وأكملت ريهام قائلة: "الناس اللي بتقول أنا غلطت كام مرة، أنا عمري ما غلطت ولا مرة، لكن عشان ببقى ناجحة قوي ومسمعة قوي بتحارب، زي الواحدة اللي راحت أجرت لي واحدة وخدوا فلوس قد كده وتطوير واترميت في السجن ٤٥ يوم ظلم.. لو أرجل راجل في الدنيا ميستحملش اللي استحملته نصف ساعة.. أنا اتبهدلت واتظلمت.. أنا عايزة أعيش حياتي كويس.. أنتم خدمتوني النهاردة، لأنكم فوقتوني وعرفتوني إني لازم أعيش لنفسي وأولادي.. كفاية كده".

وأضافت: "كفاية بهدلة بقى.. الواحد لازم يعيش بكرامة، وإحساس الظلم ده وحش قوي، كفاية بقا تعبت، خلاص بقا".

ووجهت "ريهام" رسالة لكابتن منتخب مصر السابق أحمد حسن قائلة: "كابتن أحمد حسن مامتك زي القمر وكل حاجة محدش قال إنها مش زي القمر، لكن واضح إنك ماتفرجتش على الحلقة أنت كمان وزيطت مع الزيطة وهيصت مع الهيصة.. هي زي القمر وممكن تبقى زي القمر أكتر لو خست.. مينفعش تشجعها على إنها تبقى تخينة عشان الضغط والكوليسترول ورجلها مش هتقدر تمشي عليها ونفسها تقيل، اسألها هي.. هو ده اللي أنا كنت عايزة أغيره".

وواصلت: "بيقولوا أنتم حلوين وزي القمر كده، لكن ده غلط لأنه بيتعبهم، أنا كنت منهم لكن كنت بعالجهم، لازم يمشوا صح ويحبوا الحياة وينعموا بالنعم اللي ربنا أدهالهم".

ونفت تصريحاتها المتداولة عن مرضى السمنة قائلة: "أنا ما قلتش حاجة عن التخان، كل ده تأليف وظلم بس أنتم خدمتوني وأنا مش راجعة تاني، أنا أتوقفت ٣٠ مرة، وأول مرة أقول كده.. أنا مش راجعة تاني، لأن عندي حاجات أهم أعملها.. ربنا وبعدين ولادي.. بشكركم جدا كل واحد ساهم في وقفي، بشكر جمهوري اللي هيفضل يدعيلي طول عمره، هتوحشوني وأنتم عارفين أنا عملت إيه وده يكفي".

واختتمت: "كل الناس اللي بتدخل على المواقع من غير ما تشوف بقولها بلاش تقطع فيّ ولا أقولك قطّع أنا محتاجة حسنات أكتر وأكتر".

 
 
 
 
 
 
 
 
 
 
 
 
 

#ريهام

A post shared by Reham Saeed (@rehamsaidofficial) on

 

 

 

 

 

ترشيحاتنا