تنشر «بوابة أخبار اليوم»، قصيدة «مليش غيرك»، للشاعر مؤمن حسن، ضمن إبداعات القراء بتبويب «صحافة المواطن».
بحق المشهد المكتوب فى أوجاعى
وحق غيابك الدايم وآخر لفظ فى سماعى
شهادته ودعوته ليكى وهو نزيف على دراعى
مشوفتش فيه سوى نيلك وشكل الدم فى سبيلك
مليش غيرك ..
مليش غيرك فى شريانى
تضمينى وأنا عيل وتنسينى وأنا كفران
بقيت "حيران"
حيطان أرضك بتبنى حيطان
بتهدم بيها عناقيدك
تشيل حضنك ما بين جدران
عشان يبقى القريب سيدك
ويرضيكى فى عز الليل
أكون خايف وأنا نايم على إيدك
وفيه أكتر من إن كفيف يشوف نارك فى يوم عيدك
أنا والله كان نفسى أكون موسى
أكلم ربنا عنك
وأشهدله فى يوم إنك
بقيتى تعيشى من دونك
وإن الكل بيخونك
وإيه فاضل سوى لونك
عشان يبهت كما إللى إتخان
أنا هفضل كدة شبطان وهدعيلك
بإنى مليش سوى غيره تليه غيرك
مليش غيرك ..
فى كل شوارعك الفاضية
مشوفتش فيها غير اسمك وحبيتك
مشوفتش غير بشر خايفة لمستقبل مجاش لسه
وراوى بيسرد القصة
هنا دايما فى ناس كانو
فى عز ما فيه بلاد تانية
تهاجر ناسك الغالية
عشان عارفين هناك لسة فى شخص يكون
أنا والله مش مجنون
عشان عاوزك
وشايفك لسة فيكى الروح
مفيش مجروح ملوش جارح
وعاوزك تعرفى جدا بإن إحنا إللى جارحينك
ودايما نرمى أخطأنا على إسمك وبنهينك
تعالى وطلى للماضى
فى كام واحد
مشفش زبالة فى نيلك وقال عادى
فى كام واحد فضل صامد
وقال أفكارى لبلادى
أنا واحد مشفتش فيكى غير ماضى
لكن دايما بغنيلك
رفضت إن أبقى فيكى جروح
عشان أصلا مليش غيرك.
وتستقبل «بوابة أخبار اليوم» شكاوى المواطنين ومقترحاتهم لنشرها في تبويب صحافة المواطن، بالإضافة إلى إبداعاتهم الأدبية والفنية على رسائل صفحة فيسبوك بوابة أخبار اليوم، وعلى رقم واتس آب 01200000991.
