وصلتني رسالة الكترونية من قارئ شاب لن استطيع نشرها كاملة بسبب طولها.. لن اعلق عليها واتركها بين ايديكم «كنت متحمس جدا بعد الثورة ونفسي احوالنا تتعدل ونحط نفسنا علي اول الطريق الصح وبعد كده احترت في الاختيار بين الاخوان وشفيق وكان صراع جوايا بجد وفي الاخر عصرت «لمون» وندمت اني عملت كده بصراحة وبعد كده شيلنا الاخوان وشاركت في تمرد وكنت مع فض اعتصامي رابعة والنهضة ولحد دلوقتي مقتنع بفضهم وانتخبت السيسي عن اقتناع تام بس ساعات بحس اني مفيش فايدة فينا كشعب .. انا طبيعة شغلي كمهندس بترول باقعد في الصحرا مش اقل من 25 يوم وانزل اجازة اقل من 10 ايام وباشتغل في قطاع خاص.. انا بجد مقتنع ان الحكومة والرئيس بيشتغلوا وبادعيلهم ربنا يعينهم بس الناس نفسها بقت تعمل لي احباط وجزء كبير من الاعلام كمان !!...بمناسبة كلامك بقي عن العدل والظلم..المفروض اني مهندس بترول من حوالي 400 مهندس بترول بيتخرجوا من مصر كلها كل سنة وفضلت حوالي سنة ادور علي شغل لحد مالقيت الشغل اللي انا فيه دلوقتي.. في شهر مارس 2014 الهيئة العامة للبترول عملت امتحان وكنا حوالي 700 مهندس وكان امتحان تخصص وذكاء وانجليزي ونجحت الحمدلله وبعد كده عملوا مقابلة للناس اللي نجحت ونجحت الحمد لله في كل الامتحانات من ضمن 174 مهندس نجحوا وبعد كده بيذلونا لحد دلوقتي عشان نشتغل وبرضو لسه ماشتغلناش..والمفروض اننا اعلي طلبة في مصر - لاننا خريجين بترول وتعدين..المشكلة الاكبر ان فيه ناس كتير اصحابي ظروفهم أسوأ مني بكتير ومش عارفين يشتغلوا في اي مكان..ليه الظلم دا مش عارف...وليه باحكيلك كل دا برضو مش عارف وليه قريت كلمة... وبس ؟ ولقيت نفسي لاول مرة بابعت تعليق لكاتب في جريدة مش عارف..شكرا انك قريت كل كلامي دا وآسف لو طولت عليكي او ازعجتك.. وليد الاحمدي
