اللي عمله الجيش من بطولات في سيناء خلال الأيام الماضية يتحسب للشعب لان الجيش جزء من الشعب

لو المهندس ابراهيم محلب رئيس مجلس الوزراء فاكر انه بيعلن عن خبر ان مصر في حالة حرب يبقي غلطان لأننا عارفين من زمان اننا في حالة حرب منذ ان أسقطنا الاخوان الخونة في ٣٠ يونيو..اللي السيد رئيس الوزراء مش واخد باله منه ان الشعب استحمل كل حاجة علشان عارف اننا في حالة حرب.. يعني استحملنا غلاء الأسعار- وارتفاع أسعار الوقود وحاجات كتير قوي مش عاوز أتكلم فيها.. علي فكرة احنا كمان ممكن نستحمل اكتر من كدة بكتير علشان خاطر مصر.. بس بشرط يبقي عندنا حكومة حرب بجد بها وزراء قادرون علي اتخاذ قرارات فورية وقوية لصالح الدولة..يعني عاوزين وزير داخلية يتعامل مع الارهابيين بكل حسم وقوة من غير خوف وكمان يقضي علي الفساد اللي داخل جهاز الشرطة..وعاوزين وزير تعليم عنده ضمير ويعرف يختار المناهج لتعليم اولادنا بدلا ما بيحفظوا علشان يمتحنوا وبس وبعد كده كله في سلة المهملات..وعاوزين وزير صحة يخاف ربنا ويعرف ان الشعب ده بيطلع عين أمة علشان يلاقي علاج بجد وفي الاخر بنكتشف كل مرة ان الفقير في البلد دي ما لوش علاج...يا معالي رئيس الوزراء..حكومة الحرب مش مطلوب منها تمسك السلاح وتحارب..ولكن المطلوب هو اختيار الرجل المناسب للمكان المناسب..الجيش المصري واقف علي الحدود بيحارب نيابة عن العالم والخونة في الداخل بيخططوا لضرب الشعب في اي وقت..لو سمحت.. لو كنت عاوز الشعب يحس اننا في حالة حرب بجد اصدر أوامر للوزراء والهيئات والجهات الرسمية في الدولة بإبعاد الاخوان والمتعاطفين معهم من المؤسسات لأنهم الخطر الأكبر الذي تواجهه مصر منذ قيام الثورة..اعرف انك تبذل جهدا كبيرا لتستطيع ان تلاحق متطلبات الرئيس السيسي..واعرف ايضا انك تتحمل ما لا يتحمله شاب في العشرينات ولكن عليك ان تعترف ان هناك وزراء لا يتناسبون أبدا وطبيعة المرحلة الحرجة التي تمر بها البلاد..ليس عيبا ان يفشل وزير او لا يستطيع ان يحقق المطلوب منه ولكن العيب ان نكابر ونستمر في تقديم الأداء السيئ وتكون النتيجة صفرا..
خلي بالك اللي عمله الجيش من بطولات في سيناء خلال الأيام الماضية يتحسب للشعب لان الجيش جزء من الشعب.. دول ولادنا واخوتنا يعني احنا عارفين اننا في حالة حرب بجد وعارفين ان احنا (هننتصر) بإذن الله..بس احنا بنطالب بحكومة حرب علشان نختصر الوقت ونقدر ننجز ونحقق كل الأهداف..الرئيس السيسي كل مرة يتكلم يطلب من المسئولين ان يحترموا عامل الوقت لأنه مهم جدا في بناء الدول وخصوصا لو دولة بحجم مصر.. الأعداء يتربصون بها في الداخل والخارج لانها بعون الله أجهضت اكبر مخطط في العالم لتقسيم الشرق الأوسط بفضل شعبها العظيم ورئيسها الوطني المحترم..
الاعلام الفاشل
اعتقد اننا تأكدنا جميعا والحمد لله ان اكثر من نصف المنظومة الإعلامية في مصر فاشلة وهو ما كنّا نتحدث عنه لفترات طويلة عن إعلام البامية..الأخطاء الساذجة التي وقعت فيها بعض القنوات والمواقع من نقل اخبار كاذبة ومغلوطة عن الوضع في سيناء يؤكد اننا ما زلنا إعلام الهواة.. وان بعض المحطات العميلة نجحت في لحظات لتخدع الاعلام المصري وهو ما طالبنا ومازلنا نطالب به بضرورة التأكد من صحة الاخبار وعدم الانسياق وراء الشائعات..لا أطالب بان نرد علي الاعلام الغربي لأننا لا نمتلك أدوات الرد مع الأسف ولكن علي الأقل علينا ان نحترم عقلية المواطن المصري الذي يصدق ما يكتب في الاعلام الوطني وان نقدّم له الحقائق نقلا عن مصادرها وليس نقلا عن قنوات كاذبة.. التقرير الدقيق الذي أذاعته قواتنا المسلحة عن حقيقة ما حدث في سيناء كشف المستور واجبر القائمين علي بعض المواقع والفضائيات بان يعلنوا انهم وقعوا في فخ أعداء الوطن الذين كانوا يحاولون ان يزرعوا الشك في نفوس المواطنين تجاه بلدهم وجيشهم البطل..أتمني ان نُكون تعلمنا الدرس والا نعود إلي السذاجة مرة اخري..حفظ الله مصر وجيشها العظيم وشرطتها الوطنية وكل عام والشعب بخير وفي ترابط إلي يوم الدين..وتحيا مصر