تركب مع سواق تاكسى يفضّل يلف بيك ولو المشوار بـ١٠ جنيه يقولك ٢٠ جنيه يابيه.. تروح تشترى كيلو طماطم من محل خضروات فى الرحاب يقولك بـ٥ جنية تطلع التجمع يبقى بـ٢ جنيه.. تجيب فنى دش علشان يظبط الريسيفر يقولك ١٠٠ جنيه تقوله كتير يقولك طب ادفع ٥٠ علشان خاطرك وهو أصلا ما عملش حاجة تستأهل ١٠ جنيه.. تركن فى أى شارع تلاقى واحد طلع من تحت الأرض يقولك ارجع يا باشا وبعدين يقولك ٥ جنيه ولو سألته ليه يقولك بناكل عيش كل سنة وانت طيب.. تجيب مدرس فى البيت يجبرك إنك تعمل مجموعة من ٥ أفراد وإلا تدفع ٢٥٠ جنيه لوحدك فى الحصة طبعاً ويقولك أنا بحب البن غامق والحاجة الساقعة بالثلج.. تفتح التليفزيون تلاقى ٢ مذيعين محترمين بيردحوا لبعض وكل واحد يقول للتانى اسكت بدل ما احكى تاريخك الأسود.. أو مذيع أهبل قاعد قدام ميكرفون مش عارف بيقول إية وعمال يشتم فى الناس عمال على بطال.. بالذمة دى بلد ولا ده شعب عاوز يتقدم.. لا ضمير ولا أخلاق ولا احترام ولا أى حاجة كويسة.. اللى بقوله دة واقع كلنا عايشين فيه وبنتعرض له كل يوم بس تقريباً جتتنا نحست وبقينا عايشين وخلاص.. كان الله فى عون الرئيس والحكومة.. الشعب اللى المفروض يقف جنب البلد فى الظروف السودة اللى احنا فيها عمال يقطع فى بعضه والرحمة راحت من قلوبنا ومفيش حد بيفكر فى التانى كلة بيقول يا نفسى.. إيه رأيكم نبدأ من جديد كلنا كدة ونرجع زى زمان لما كان الصغير بيحترم الكبير ولما كنت تلاقى ست كبيرة ماشية فى الشارع وشايلة شيلة تقيلة تجرى عليها وانت ما تعرفهاش وتقولها انا هوصلك يا أمى.. ولما كان البقال يقولك الجبنة اللى عندى مش حلوة تعالى خد بكرة.. أو لما سواق التاكسى كان يقف فى الإشارة والعداد يعد وانت نازل يقولك جنيه بس حتى لو العداد عمل ٢ جنيه.. ما أهو اللى مخلى الواحد هيتجنن من السلوك ده أنه شاف نفس الشعب فى نفس البلد وهو بيتعامل بضمير ولما تسأل حد إيه اللى حصل يقولك إفرازات الثورة.. ملعونة الثورة اللى خلت الأخلاق تغيب واللى خلت الضمير يموت واللى خلتنا بناكل فى بعض زى الحيوانات وكل واحد ممكن يدوس على اللى جنبه علشان يوصل وبس.. احنا كلنا مش عاوزين نصدق ان احنا فى حالة حرب بجد وإن الأعداء فى الخارج مازالواحتى الان ينتظرون ان نسقط لتتحول مصر إلى سوريا او ليبيا.. لو كان ربنا سترها معانا بفضل الناس الغلابة اللى بتدعى من قلبها احنا كمان لازم نعمل الصح ونفتكر ان احنا الشعب اللى صدر الحضارة لكل دول العالم وعلمنا الشعوب الاسلام اللى هو (قايم أصلا)على الصدق وعدم الغش والأمانة والنظافة وحب الخير للآخر.. ايه اللى حصل يا مصريين بطلنا نخاف على بعض ليه وبطلنا نحب بلدنا ليه.. لو كُنتُم فاكرين ان الرئيس السيسى هيعمل كل حاجة لوحدة تبقوا غلطانين.. الراجل لما بيطلع يقول أنه مش هيقدر يعمل كل حاجة لوحده هو بيتكلم بصدق لأن البلد دى مش هتقوم طول ما احنا بنعتمد على بعض.. اللى فاكر أنه عايش على حساب غيره هييجى اليوم اللى مش هيقدر لا هوه ولا غيره على الصمود لأن الموضوع كبير علينا كلنا ومحتجنا كلنا علشان نعدى من مرحلة الخطر اللى كل ما بنقول فرجت تطلع لينا مصيبة ترجعنا تانى للخلف.. أنا مصدق أن الاعلام هو سبب نكسة البلد وان التخاريف والهيافة اللى يبخرج بيها الإعلاميين على الشعب كل يوم من اهم أسباب تردى مستوى الحوار بين المصريين.. ده انا ما شفتش برنامج واحد بيتكلم على ان البلد فى حالة حرب وكل يوم بيسقط شهداء من الجيش والشرطة والقضاة على يد الإرهابيين الخونة وكان الأمور أصبحت عادية ومن أساسيات الحياة اليومية.. ومشفتش برنامج بيقول للتجار ان الغش حرام واستغلال الناس حرام وان اللى يخرب بلدة أو يسرق أخوه يكون إنسان سلبى ويبقى بيخالف تعاليم الدين.. فين البرامج الهادفة. وفين الأفكار المحترمة.. خلوا بالكم العالم بقى شايفنا زى ما انا بقول بس احنا مع الأسف مش عاوزين نشوف الحقيقة وعايشين فى دور اللى فاهمين كل حاجة واحنا مش فاهمين اى حاجة.. لو كان فى فرصة أخيرة للخروج من هذه الحالة البائسة ياريت نسارع كلنا ونفتكر اننا فى مركب واحد وان اللى بيخرم فى المركب واحنا واقفين نتفرج علية هيكون مصيرنا كلنا الغرق لان ماعرفناش نقول على الغلط غلط وقعدنا كلنا فى كراسى المتفرجين.. اللهم احفظ مصر وشعبها وابعد عنا الغش والفساد واللا مبالاه واجعلنا من الذين يسعون للخير فى الأرض.. وتحيا مصر
