قلت لزوجتي وللبنات ولجميع الأصدقاء أن كل من له طلبات ما عليه سوي أن يكتب ما يريد في ورقة ويذهب بها إلي العتبة أو إلي أي سوق أو دكان مجاور
كنت قد قررت عدم شراء أي شيء من الصين بل وقلت لزوجتي وللبنات ولجميع الأصدقاء أن كل من له طلبات ما عليه سوي أن يكتب ما يريد في ورقة ويذهب بها إلي العتبة أو إلي أي سوق أو دكان مجاور لبيته وهناك سيجد ما يريد من البضاعة الصيني التي وحدت بين الشعوب، اثنان فقط لم أستطع أن أطلب منهما أن يذهبا للعتبة ليس فقط لظروفها الصحية ولا للبعد الجغرافي للعتبة عن مقر إقامتهما ولكن لأنهما أبويا الحاج احمد مبارك وامي الحاجة ام هشام التي اتصلت بي بعد يومين من وصولي للصين وكانت هذه المكالمة:
- باقولك إيه نسيت أقولك علي حاجات مهمة عايزنها أنا وابوك.
- خير يامه تحت أمرك انتي والحاج.
- الشتا هجم علينا ياولدي والزكام عامل عمايله وعايزاك تجيبلي أبوفاس من الصين مفيش حاجة بتروقني غيره.
- مش متخيل بصراحة الاقي أبو سيف ده فين في الصين؟
- هههههههه الله يحظك ياولدي اسمه ابو فاس ابوفااااااس ولا خلاص قعدتك في مصر نستك لغوتنا؟ عموما حتلاقيه عند أي عطار علي أي ناصية عندك!
- محسساني انك مواليد بكين يامه.
- ابوك كمان عايز راديو ترانزستور.
- ترانزستور ايه يامه الحاجات دي قديمة أوي ومفتكرش انها لسه موجودة في الصين ولا في أي حته في العالم.
- اتصرف أبوك مش عايزك تجيبله حاجة حديثة مايعرفش يتعامل معاها هو عايز الترانزستور وبس.
- مش متخيل بصراحة الترانزستور ده ممكن ألاقيه فين لكن أوعدك أدور عليه.
- مفيش حاجة اسمها مش عارف، بيقولك هتلاقيه بيتباع علي الرصيف عندك.
- محسساني ان ابويا مواليد شنغهاي يامه.. الصين ياحبيبة مفيهاش ناس بتبيع في الشارع كده زي عندنا في مصر.
- مفيهاش ازاي ياولدي إذا كان الصينيين بييجوا هنا لغاية البيت بيبعولنا كل حاجة ومش بس كده من يومين جالنا حلاق صيني عايز يحلق لأبوك!
- معقولة يامة الكلام ده ناقص كمان تقوليلي فيه كوافيرة صينية عايزة تصبغلك شعرك ولا تسشورهولك!
- أصلك قليل رباية.. تصبغ لمين هو انت فاكر شعري شاب زيك انت وابوك؟
- لا سمح الله أنا بس يعني مستغرب.
- متستغربش لأن الحلاق قال لابوك لو عايز كوافيرة للحاجة ممكن يبعتلنا مراته!
- أنا مش عارف الصينيين إيه إللي يخليهم يسيبوا بلادهم الحلوة دي ويسافروا يتشحططوا في بلاد الناس.
- أكل العيش ياولدي زي مانت سايبنا وقاعد في مصر علشان لقمة العيش!
- يامه الصين دلوقتي قوة عظمي والبركة في ماوتسي تونج.
- ويطلع مين سي كينج كونج ده؟
- ماوتسي تونج ده الزعيم الصيني الكبير إللي نقل الصين نقلة تانية خالص.
- يعني هيكون احسن من عبد الناصر ياولدي، قال كينج كونج قال.
- لا طبعا مش احسن، عموما ليكي عليا اشوف طلباتكم، عايزة حاجة تانية؟
- أيوه آخر حاجة عايزاك تجيبلي شريط للمطرب الشعبي الصيني ابو الليف؟
- هو فيه مطرب صيني اسمه ابو الليف؟ ده مصري يامه أبا عن جد.
- ماهي الصين بتقلد كل حاجة وضروري فيه عندهم أبو الليف.
- طيب شريط إيه ده إللي انتي عايزاه؟
- الشريط بتاع اغنية أنا مش خرنج أنا ماوتسي تونج
