المسحراتي"الحلقة الأولى" 2012- ص 04:45:25 الجمعة 20 - يوليو يا هادى فؤاد حداد اصحى يا نايم وحّد الدايم وقول نويت بكره ان حييت الشهر صايم والفجر قايم اصحى يا نايم وحّد الرزاق رمضان كريم مســحـراتى مـنـقـراتى بعد الصلاةِ على نبينا باقول يا هادى العقل زينه الله هادينا ع الندهه جينا على ريح حجازى سقنا الهجينه الله يجازى اللى يهاجينا أنا قلت نخلى أحسن مناخ لى حطّ السفينه دا نخيل سباطُه قطع رباطُه خد تحت باطه كل المدينه حمام بلدنا زغلول بلحنا فرد جناحنا على وادينا وكان فلاحنا دنيا ودينا بتنا وصبحنا أحرار وادينا ليلنا وصباحنا عرسان عرايس نقيم فرحنا وولاد مدارس يكمل نجاحنا وعرب فوارس نقول فتحنا فتحاًَ مبينا أنا قلت سجده للهِ سجده لعدوى سَكْته الرؤيه ثابته والمشى طاب لى والدق على طبلى ناس كانوا قبلى قالوا فى الأمثال: "الرجل تدب مطرح ما تحبّ"" * * * وانا صنعتى مســحـراتى فى البلد جوال حبّيت ودبّيت كما العاشق ليالى طوال وكل شبر وحتّه من بلدى حتّه من كبدى حتّه من موّال: فى عينى إنسان وفى عيون البلد إنسان حلوه البلد بعد ما داست على الأوثان حلوه البلد شهداءها قدّموا العرسان حلوه البلد يا أحن قلوب وأوفى لسان غنى الأمل يا حبيب والفتح يا حسان ما سمعت الدنيا أمثال العرب شُعَرَا ولا رأت مثل فرسان العرب فرسان اصـحى يا نايم وحّد الدايم السعىُ للصوم خيرٌ من النوم دى ليالى سمحه نجومها سبحه اصـحى يا نايم يا نايم اصحى وحّد الرزاق
المسحراتيالحلقة الأولى
