طالب الرئيس عبدالفتاح السيسي، كافة وسائل الإعلام، بالحديث عن أهمية مسار الإصلاح الاقتصادي، الذي اتخذته الدولة، وذلك في معرض كلمته بحفل ختام مؤتمر الشباب الرابع بالإسكندرية.
وأضاف الرئيس السيسي، في كلمته خلال الجلسة الختامية قائلا: "المؤتمر المرة دي ناقش موضوعين في منتهى الأهمية ولهم ارتباط وثيق ببعضهم البعض، الإصلاح الاقتصادي والدولة الفاشلة، وكأن بيقولوا للمصريين إنه فيه ارتباط وثيق بين الموضوعين«.
وتابع: »مصيدة العوز اللي بيحاولوا دايما يحطونا فيها، واللي هيترتب عليها ضياع التعليم والصحية والمستقبل وإفشال الدولة، وإفشال الدولة يؤدي لمزيد من العوز، وعشان كده كان لازم المصيدة نكسرها، وناخد الإصلاح الاقتصادي لمجابهة محاولات إفشال الدولة المصرية وهدم الدولة المصرية، والموضوعين دول ما يغيبوش عننا أبدا وبطالب الإعلام والمثقفين، والإعلام يعمل أسبوع للموضوعين دول، وعرفوا الناس الحكاية أكتر".
وبشأن حديثه عن مصطلح "فوبيا إسقاط الدولة"، قال: "عيني على إسقاط الدولة من 2011، عيني على تحطيم مصر من 2011، اللي هو كان بداية النهاية، ومحدش يقدر يقف قدام مخطط بالحجم ده غير الشعب، والكل أدوات ووسائل تستخدم لتحقيق الهدف ده سواء عارفين أو مش عارفين، ومحدش يستطيع يغلب إرادة شعب مصر".
وأضاف: "شعب مصر غالبيته شباب وأقول له أنا أمنتك على مصر واستقرارها وسلامتها، وأنا أمنت شباب مصر، تاني.. قدام الشعب المصري وقدام ربنا، بأمنكم تحافظوا على بلدكم وتحموها ومفيش حد يقدر يمسها طول ما أنتم موجودين".
